UMCULI kamaskandi osematheni uMenzi Mabizela, uzimisele ngokuguqula isithombe esibi ngendawo yangakubo uMnambithi, edume kwabaningi njengenodlame, izimpi nokubulawa kwabantu ngesibhamu.
Uthi ufisa ukuhlanganisa umphakathi wakule ndawo ukuba ubumbane, kube nokuthula, kugezeke igama loMnambithi ezweni. Uzosebenzisa ubuciko njengeqhinga lokuhlanganisa umphakathi njengoba ehlela idili lomculo elizoba kule ndawo. Akulona nje idili okuzonandisa kulo amaciko asendimeni kamaskandi kuphela, kodwa kuzoba khona lonke uhlobo lwabaculi.
UMenzi utshele ILANGA ukuthi kuningi afisa ukukwenza emphakathini waseMnambithi ngenhloso yokuthi le ndawo idume ngezinto ezinhle. Uthi uma kukhulunywa ngoMnambithi, akupheli kwabanye ukuthi le ndawo inodlame lokubulawa kwabantu ngesibhamu, nezimpi.
“Sizama ukuhlanganisa abantu emphakathini (babumbane) ngoba indawo yakithi kayikhulunywa kahle, kanti nokubekezelelana akukho ezakhamizini. Mhlawumbe uma senza idili lomculo elizobahlanganisa, kungenzeka umehluko. Ngizimisele ngokuhlanganisa abantu, bajabule ngayo yonke indlela, kugqame nokuhle ngabantu bangakithi,” kusho uMenzi.
Kulo mcimbi awuhlelayo ozokuba ngomhla ka-29 kuLwezi (November), eSettlers Park, eMnambithi, ubophele abaculi bezinhlobo ezahlukene zomculo. Phakathi kwabaculi abazobe benandisa kubalwa uBig Zulu, uJumbo, uDj Kepza, uDj Mlu, uNjoko, uNtencane, uLimit, uKhuzani, uMthandeni, uBahubhe, uGatsheni, uGadla, uFalabo, uJaiva, uMzukulu, uMafikizolo, uSminofu, uThokozani Langa, uNjabulo Langa, uQuality, uMlabalaba, uGcabashe, uMnyovu, uMjolisi, uMashelela nabanye.
Amathikithi atholakala eComputickets, eCheckers, eShoprite, kusukela ku-R150 kuya ku-R500.
