INTATHELI YELANGA
UMENGAMELI uCyril Ramaphosa uthi iNingizimu Africa izinikele ekuqiniseni ubudlelwano nezwe laseNigeria, ngenhloso yokwenza lula ukuhwebelana phakathi kwalawa mazwe.
URamaphosa uveze lokhu enkulumweni yakhe emhlanganweni weSA-Nigeria Bi-National Commission ngoLwesibili eTuynhuys, eCape Town.
“Uhulumeni wethu uyaqhubeka nemizamo yokwenza kube lula ukuqhuba ibhizinisi eNingizimu Afrika. Sifuna kube lula kubatshalimali ukusebenza, ukuhweba nokusebenzisa amathuba emikhakheni eyehlukene kuleli,” kusho uRamaphosa.
Uthe iNingizimu Afrika izothambisa imithetho ye-visa phakathi kwayo neNigeria.
“Sikulangazelele ukubona zanda izinkampani zaseNigeria ezitshala imali eNingizimu Afrika. Sifuna ukubona imikhiqizo yaseNigeria idayiswa ezitolo zakuleli.”
Ukwenza izinto zibe lula, uRamaphosa uthe osomabhizinisi baseNigeria abagunyaziwe bazonikwa i-visa evulelekile, yeminyaka emihlanu, yokungena noma yikangaki kuleli, ngaphandle kwezindleko ezengeziwe.
“Ngaphezulu kwalokhu, izivakashi ezivela eNigeria seziyakwazi manje ukufaka izicelo zama-visa ngaphandle kwe-passport. ”
Uthe iNigeria yizwe elakuleli elihwebelana kakhulu nalo kunawo wonke aseWest Africa. Uthe ziningi izinkampani zakuleli ezihweba eNigeria.
“Siyohlezi siyibonga iNigeria ngeqhaza layo ekuholeni umkhankaso wamazwe owawuhlose ukuqeda ubandlululo (apartheid) eNingizimu Afrika. Njengoba siqeda iminyaka ewu-30 yenkululeko, sibona ikusasa eliqhakazile ebudlelwaneni bethu neNigeria.”
