LUCKY CAIN
UMLINGISI wodumo uCharmaine Mtinta ucacisa ngokulaxaza umdlalo kamabonakude owuchungechunge iSmoke and Mirrors ekhonjiswa esiteshini sikamabonakude esizimele i-etv.
UCharmaine odlala indawo kaNomeva kulo mdlalo kusabalale izindaba zokuthi usewulaxazile lo mdlalo ngenxa yokuvumelani ngendlela yokusebenza kulo mdlalo.
Eminye imibiko esabalalile wukuthi ukhonjwe indlela ngenxa yokuzikhukhumeza nokufuna ukuphathiswa okwaqanda ukudlula abanye abalingisi.
Esitatimendeni asikhiphile lo mlingisi oseke wabonakala emidlalweni eyahlukene kumabonakude uvumile ukuthi nebala seligqabukile igoda lokusebenza phakathi kwakhe nalo mdlalo.
Uyichithile imibiko yokuzikhukhumeza nokuthi ukhonjwe indlela.
Uthe le mibiko iyamthunaza futhi ibeka ikusasa lokusebenza kwakhe engcupheni.
Ecacisa ngokwenzekile uthe uxhumane ngendlela ehambisana nokusebenza nabaphathi balo mdlalo babonisana ngendawo yakhe kuwona.
“Nakuba sigcine ngokungavumelani kodwa izingxoxo zethu zihambe kahle futhi sanikezana inhlonipho efanele,” kuchaza lo mlingisi oseke wabonakala emidlalweni okubalwa kuyo iYizo Yizo, Isibaya, How To Ruin Christmas, The River, Scandal! neminye.
Uthe usazimisele nokuqhubeka nokuvezela abantu ikhono lakhe kulo mkhakha ngaphambi kokuthi adlulise ukubonga.
