UMLINGISI kamabonakude uLesley Musina ukhumbuze izinkumbi zabantu ebezihambele inkonzo yokukhulekela uNgqongqoshe wamaPhoyisa osamisiwe uMu Senzo Mchunu ngemisebenzi emihle ayenzele umphakathi waseShayandima eVhembe eLimpopo.
Le nkonzo ibisebandleni iChrist Worship House elingaphansi kukaMfu Mpho Ramphago ngoMgqibelo.
UMusina ubengesinye sezicukuthwane kule nkonzo eyingxenye yemizungezo kazwelonke yokukhulekela uMchunu njengoba esamisiwe emsebenzini wakhe kulandela izinsolo ezenziwa uMkhuzi wamaPhoyisa KwaZulu Natal uLt Gen Nhlanhla Mkhwanazi ngonyaka owedlule.
Ngemuva kwalezi zinsolo uMengameli Cyril Ramaphosa wasungula ikhomishini eholwa iJaji eselathatha umhlalaphansi uMbuyiseni Madlanga esiyaziwa ngeMadlanga Commission ngenhloso yokuphenya.
UMchunu useke wavela phambi kwale khomishini waluchaza uhlangothi lwakhe ngezinsolo ezenziwa uMkhwanazi.
Ekhuluma kule nkonzo uMusina uthe uthe abakwazi ukumlahla uMchunu ngoba bayobe sebefana nabakhohlwa imisebenzi yakhe abenzele yona behlupheka eVhembe bebulawa isomiso samanzi.
“Asikwazi ukukhohlwa imisebenzi emihle uMchunu asenzele yona eVhembe singenawo amanzi. Namhlanje sinezindawo eziphuma amanzi ngenxa yesivumelwano asenza neZimbabwe ukuze sibenengqalasizinda ekwaziyo ukusikhiqizela amanzi,” kusho uMusina.
Amalunga ekhwaya iWorship House nawo aphumele obala esiteji ngokuseka uMchunu.
Akubeke kwacaca ukuthi abantu baseLimpopo kumele baqonde ukuthi ukuhlaselwa kukaMchunu ngaphandle kobufakazi beMadlanga Commission, kuyitulo lokulwa noMengameli uCyril Ramaphosa.
Le nkonzo ebihlanganise amahlelo ehlukene ngaphansi kwesiFunda iVhembe abephume ngobuningi ukuzoba ingxenye yemikhuleko kazwelonke kaMchunu eqhubekayo eziFundazweni ezahlukene.
UMu Ramphago weChrist Worship House uthe sekuyisikhathi sokuba amakholwa akhulekele uMengameli wezwe uMnuz Ramaphosa ngoba bayakholwa ukuthi izimfamona ezibhekene noMchunu zibhekiswe kuyena ngqo (umengameli).
“Kumanje kuningi ukuhlaselwa okubhekiswe kuRamaphosa noMchunu ekubeni iKhomishini kaMadlanga ingakatholi noyedwa wabo enecala. Ngakho isikhathi lesi sokuba kuyekwe ipolitiki kodwa kukhulekelwe uMengameli noNgqongqoshe bakhe ngoba bonke abaholi babekwe ngogcobo lukaThixo ukuba babengabaphathi bezwe. Siyadinga ukuthi neMadlanga Commission siyikhulekele ukuze ikwazi ukusebenza ngaphandle kokusatshiswa nengcindezi engenasidingo,” kusho uMfu Ramphago.
Uqhuba uthi kuwumsebenzi wamakholwa ukuhlale ebeka emkhulekweni abaphathi bezwe ukuze izwe libenensindiso ukuze nokubanyonyobelayo okubi kungenzeki.
Kule nkonzo amakholwa agide kwaze kwayovalwa. Kuzokhumbuleka ukuthi amanye amakholwa aseke azithola ehlalselwa ngokuphumela obala ekhulekela uMchunu.
Lokhu kuhlaselwa kwenze abanye abefundisi bachaza ukuthi bona bakhulekela ngisho ababulali abasemajele nabadonsa iminyaka ngenxa yokuthi abakhethi bala lamuntu futhi kabehluleli muntu njengoba iBhayibheli liyabavuna ngokuthi bangabahluleli abantu.
Lezi zinkonzo ziqale esiFundazweni iMpumalanga, zadlulela eKwaZulu Natal naseWestern Cape njengoba beziseLimpopo.
Nakuba lezi zinkonzo zimayelana naye uMchunu kodwa akakaze ahambele ngisho eyodwa kuzo ngaphandle kwalena eyayisemzini wakhe eMpangeni.
