LUCKY CAIN
UYAZIGQAJA ngebanga aselihambile emdlalweni owuchungechunge, Uzalo, umlingisi owaba ngowokuqala ukubonakala kulo mdlalo eminyakeni ewu-10 eyedlule. USimphiwe Majozi (osesithombeni) odlala indawo kaSbu, nguyena mlingisi osebe kulo mdlalo isikhathi eside kanti kuvele ukuthi usazoqhubeka nokubonakala nangesizini ezayo.
Lo mdlalo kulindeleke ukuba uqale isizini ka-10 ngonyaka ozayo kanti indawo yakhe isazoqhubeka nokukhula njengoba kuvele ukuthi angase abonakale esengumfundisi kuwona. Ekhuluma neLANGA uthe uzizwa ethobekile ukuthi namanje usayingxenye yalo mdlalo futhi indawo yakhe abantu basaqhubeka nokuyithakasela. “Ukudlala uSbu kungikhulisile njengomlingisi,” kusho uSimphiwe.
Uthe okumchaza kakhulu ngokudlala le ndawo wukuthi ibuye ibe namahlaya, okwenza abantu bayithokozele. “Uyazi abantu sebeze bacabange ukuthi ngingusomahlaya uma behlangana nami emgwaqweni ngenxa yokudlala indawo kaSbu. Empeleni mina ngingumlingisi nje, kangiyena usomahlaya,” kusho uSimphiwe ozobonakala ephethe uhlelo emcimbini wamahlaya obhekwe ngabomvu, iSA Best Comedy Experience ozoba seThe Playhouse eThekwini mhla ka-15 kwephezulu. “Kulo mcimbi ngifuna ukucacisa ukuthi ngizobe ngingumphathi wohlelo, bakhona osomahlaya abazobe beboshelwe futhi engibathembayo ukuthi bazoshiya abantu kubuhlungu izisu,” kusho yena.
Uveze ukuthi kulo mcimbi uSkhumba Hlophe, uFelix Hlophe, uNonto R, u-Isaac Gampu, uSimphiwe Shembe nabanye. Lo mcimbi usungena esigabeni sesibili njengoba wenzekile eGoli lapho amathikithi adayiswa aphela. Amathikithi aseqalile ukutholakala ngo-R250 eWebtickets nasezitolo.
