UMNYANGO wezeMpilo eKZN uwubiza ngamampunge umbiko ovezwe nguMnu Zwakele Mncwango onguSihlalo we-Action SA ngokushoda kwemishanguzo ezibhedlela nasemitholampilo kahulumeni .
Isitatimende esibhalwe nguMnyango wezeMpilo oholwa nguNkk Nomagugu Simelane -Mngadi sifundeka kanje:
Kungaba iphutha elikhulu ukuthi imibiko engasilona iqiniso nengamampunge ekhishwe ezinkundleni zokuxhumana ikhansela lase Thekwini uCllr Zwakele Mncwango siyishiye singayiqondisile siwuMnyango.
Ngoba kuyacaca ukuthi ngale video nesitatimende esingesilona iqiniso leli khansela linezinhloso zokuholela ophathe umphakathi, nokudicilela phansi isithunzi soMnyango wezeMpilo esifundazweni.
Asinaso isiqinisekiso sokuthi yingani leli khansela likhethe ukuthi liyobika inzwabethi ezinkundleni zokuxhumana ngale kokuyiqinisekisa nomnyango, ekubeni linayo yonke imigudu nezindlela zokuxhumana nqo nomnyango.
Asiqale ngokuqinisekisa izakhamuzi zesifundazwe ukuthi akusilona iqiniso ukuthi sesiphelelwe imithi ezibhedlela nasemitholampilo yesifundazwe.
Lemibiko siyithatha njengohubhu nje lukabhejane oluqhamuka kukhansela. Okubuhlungu ukuthi asizazi izinhloso zikakhansela zokwedukisa umphakathi ngalolu hlobo.
Sihlale siwexwayisa nomphakathi ophila ngokwenza i-Content emakhasini ezokuxhuma ukuthi sicela ukugweme ukwakha i-Content ngezindaba ezibucayi nezithinta izimpilo zabantu zomnyango wezempilo, ikakhulukazi lezo zindaba uma zingaqinisekisiwe ngoba kulicala elibomvu ukudukisa umphakathi ngezindaba ezingesilona iqiniso ‘fake-news’ ezithinta ukuphila kanye nezimpilo zabantu.
Lokhu sikuthatha njengeshobolo elikhulu uma lomkhuba sewenziwa nayikhansela okungumuntu okumele ngabe umele wona umphakathi hhayi ukuwedukisa.
Singakusho singananazi ukuthi abukho nobuncane ubuqiniso kulesi sitatimende kanye ne-Video ekhishwe ilelikhansela.
Empeleni, sithanda ukumphonsela inselelo yokuthi asiphe ubufakazi bezinsolo zakhe ngokuthi asitshele ukuthi ngabe isiphi isikhungo noma umtholampilo akhuluma ngawo, asiphe ukuthi iphele kuphi nendawo imithi, aphinde asixhumanise nabo bonke labantu athi abayitholile imishanguzo.
Simphonsela lenselelo ngokungananazi ngoba siyazi ukuthi abukho nhlobo ubuqiniso emibikweni yakhe.
Ngebhadi elikhulu ubuye wavele wakhetha ukumboza yonke imitholampilo ngabhande linye wathi ayisenayo imithi kanye nemishanguzo.
Lokhu kukwenza kucace bha ukuthi ukhansela unezinhloso zokubheca umnyango. Ngoba ukuba inkulumo yakhe beyihlose ukwakha isizwe nokusiyisa phambili ubezosipha imininingwano yesikhungo akhuluma ngaso, asiphe nomuntu okunguyena ongawatholanga amaphilisi ngoba kuyacaca ukuthi akusiyena njengoba yena ekucacisile kwi-Video yakhe ukuthi yena akazisebenzisi izikhungo noma imitholampilo yemiphakathi kodwa usebenzisa lemitholampilo ezimele ngoba une-Mediacal Aid.
Kodwa wakubona kufanele ukuthi abike imibiko engasilona iqiniso ngendawo angakaze ayisebenzise.
Ukube ubebuzile ngemigudu efanele ngabe sikwazile ukuthi simchazele ngaphambi kokuba azihlaze ngalolu hlobo.
Kuyichilo nehlazo ukuthi umuntu osesigabeni sakhe asebenzise izinkundla zokuxhumana esabalalisa izindaba ezingesilo iqiniso ‘fake-News’ ngenhloso yokwedukisa umphakathi.
Iqiniso ngalolu daba abezama ukubika ngalo ukhansela engaluqinisekisanga wukuthi, uMnyango usanda kukhipha umyalelo wokuthi uhlelo loku-order impahla – nemithi – ebithengwa ngqo yizibhedlela sekuzolawulwa enhloko-hhovisi.
Lokhu kuyingxenye yokuzama ukonga imali njengoba kwaziwa ukuthi sekunesikhathi umkhakha wezempilo ungasitholi isabelo-zimali esanele ukubhekana nazo zonke izidingo zawo. Siyazi kukhona abangeneme ngalokhu, okungenzeka bagcine sebezihlanakezela lezi zindaba ngenhloso yokudukisa umphakathi.
Empeleni, eminyakeni ecishe ibe yisithupha eyedlule, lesi sabelo sesehluleke wukwenyuka ngemali engaphezu kuka R12 billion, nokuyifakayo incindezi esabelweni sezimali zomnyango njengoba intengo yezinto yenyuka njalo, futhi nesimo somnotho sinzima. Nokwenza sihlale ngokubuyekeza izindlela namasu ahlukahlukene okusenzisa izimali ngendlela ephusile nokonga lokhu umnyango okutholayo.
Yize noma kunjalo asikafiki esigabeni lapho sithi asisakwazi ukuthenga imithi. Iqiniso lithi iKwaZulu-Natali ingesinye sezifundazwe ezibalwa njengezihamba phambili ekusabalalisweni kwemishanguzo kanye nokuba nemithi yokuhlinzekwa kulabo abafika ezikhungweni zethu.
Ngakho-ke siyacela ukuthi abantu bakithi bangathuki futhi bengavumi ukudukiswa ngabantu abasabalalisa izindaba ezingama mpunge ‘Fake-News’.
Iqiniso lithi basengeza ezikhungweni zethu. Imithi ikhona namaphilisi akhona.
Uma unganelisekile ngemithi oyitholile ungabika kumphathi wesikhungo (CEO) noma kumxhumanisi wesibhedlela (PRO). Ungadlulela nakumphathi wesiFunda (District Director).
UNgqongqoshe wezeMpilo uNksz Nomagugu Simelane wabacela ukuthi basabalalise izinombolo zabo zomakhal’ ekhukhwini bazibeke obala ezindongeni zezikhungo zezempilo (Notice Boards).
Uma usuhlulekile kuyo yonke lemigudu ephakanyisiwe ukuthola usizo ungaxhumana ngqo nehhovisi likaNgqongqoshe ngo-Whatsapp kule nombolo elandelayo: 082 314 1167. Yonke lena yimizamo yomnyango yokuthi kungabi khona ilungu lomphakathi eliphuma esibhedlela linganelisekile ngosizo elilutholile.
