KUVELE Advocate Zandile Mshololo njengozohola isicelo sokuba kuhoxe imantshi eyengamele icala lalowo owayengumsakazi woKhozi FM uSiyabonga “Siya” Mhlongo.
Lokhu kuvele ngoLwesihlanu eNkantolo yeMantshi yaseThekwini, lapho obekulindeleke khona ukuba kulalelwe isicelo sohlangothi lwabammeli bammangalelwa sokuba kuhoxe iMantshi uMhlonipheni Sibiya kuleli cala.
Isaziso sokufakwa kwalesi sicelo sifakwe kule nkantolo ngoMsombuluko, obekumele kuphume ngawo isigwebo kodwa kwangenzeka ngenxa yokuthi abameli bakaSiya u-Adv Cyril Simphiwe Mlotshwa noMmeli uSikhumbuzo Mathabela, batshela umshushisi uMnu Siduduzo Ntshayintshayi noSibiya ukuthi kunabammeli abathinte ikilayenti labo belazisa ngezinhloso zabo zokufaka lesi sicelo.
NgoLwesihlanu kufudwe enkantolo igama lika-Adv Mshololo njengozohola uhlangothi lukaMhlongo ekufakweni kwalesi sicelo. UMathabela utshele inkantolo ukuthi uMshololo, obengekho enkantolo, ucelwe yizihlobo nabangani bakaSiya abakhathazekile ngokuqhubeka kwecala.
