UMCULI kamaskandi uMthandeni SK Manqele uthi unethemba ngokwelulama kwegidangoma lakhe uShilisi Langa, elibe sengozini yemoto ngoMgqibelo ebusuku bephuma konandisa emcimbini, sebeya komunye.
Le ngozi yenzeke kuN3, eduzane ne-toll-gate eyehlukanisa uMnambithi neBergville. Ekhuluma neLANGA, uMthandeni uthi ubonga uNkulunkulu ngemiphefumulo esindile kule ngozi.
“Besihamba ngezimoto silandelana nabafowethu kwazise besizama ukuphuthuma ukubamba isikhathi, njengoba kade kufanele sihambele imicimbi emithathu. Kuqhamuke imoto eyiveni ingakhanyisile nokuthe uma ifika ngasemotweni kaMasondo, bazama ukuvikana, okuyilapho zitholane khona mahlanze. Ngeshwa imoto ize ngasesicabheni sikaShilisi kwaba nguyena othinteka kabana njengoba eshayeke isingenzansi. Sinethemba lokuthi uzolulama. Esikubonga kakhulu nje wukuthi imiphefumuo isindile,” kuchaza yena.
UMthandeni uthi usola uphuzo oludakayo kwabashayise imoto ebihamba amagidangoma akhe.
“Okubi kakhulu wukuthi imoto ebashayisile ibilayishe ngokweqile futhi ihamba abaphuzile. Sinethemba lokuthi umthetho uzodlala indima yawo. Silimele kakhulu ngalokhu okwenzekile kodwa sinethemba lokuthi umfowethu uzolulama ngokushesha. Sinethemba lokuthi akaphukile,” kuphetha uMthandeni.
UShilisi ungomunye wamagidangoma asezakhele igama kule ndima kamaskandi njengoba aqala ukugidela enye yezinkakha kulo mculo okunguKwakhe ‘Mgqumeni’ Mseleku ongasekho.
