UPHASHANYISWE ngamaciko olunye uhlobo lomculo ngeLive Concert yakhe, umculi kamaskandi uSfanele “Mzukulu” Zulu. Lo mculi ubenze umcimbi izinsuku ezimbili ngoLwesihlanu nangoMgqibelo, eThe Playhouse, eThekwini.
UMzukulu uthi ukusondelana noSjava, kumenze wafunda okuningi njengoba eyiciko (uSjava) elenza imicimbi yalo kule ndawo, licule bukhoma. Uthi komaskandi akujwayelekile ukuthi iciko lizimele, lenze umcimbi ongalo ngqo, okuvamisile wukuthi amaciko enze amafestivali, abize amaciko amaningi.
“Bekungelula ukuqunga isibindi kodwa ngenxa yamandla alo msebenzi (albhamu), ngibonile ukuthi kuzokwenzeka ngempumelelo konke. Sengineminyaka ngicula, kodwa ukuhamba kahle kwale albhamu ethi, ‘Ngifuna Intozami’ yikhona okungenza ukuba ngiwenze lo msebenzi ukubonga impumelelo yayo phambi kwabantu okuyibona abayeseke kakhulu,” kusho uMzukulu.
Le albhamu inezingoma eziwu-17, zine kuphela ezingenawo ama-million ( izinombolo zabayi- lalelile) kuyona. Ezimbili kuzona zinama-million angaphezulu kuka-10 ingoma ngayinye. UMzukulu uthe lezi zibalo zikhombisa ukuthi baningi kakhulu abantu efinyelele kubona i-albhamu yakhe.
“Yingakho kufanele ukuba umjikelezo wami ngiwuhambise nakwezinye izindawo, kungabi wukuthi uphelela KwaZulu-Natal kuphela.Ngiyabonga kakhulu ukuthi abathandi bomculo, bakhombise uthando ngoba namathikithi asheshile ukuphela,” kusho uMzukulu.
UMzukulu uthi lo mcimbi ubuzokuba wusuku olulodwa, kodwa kuthe ezinsukwini ezimbili kuqalile ukudayiswa kwamathikithi, aphela. Uthi lokhu kuphoqe ukuba aqhamuke neqhinga lokuthi iPlayhouse ivulwe izinsuku ezimbili.
“Kungithuse kakhulu okwenzekile, bengingacabangi ukuthi kungenzeka. Bengingaziboni ngiyiciko elingaba nesibindi,” esho.
I-Playhouse Theatre imumatha abantu abawu-1 225. Izinga lokuhleleka komcimbi beliphezulu kakhulu.
