UNDUNANKULU waKwaZulu-Natal, uMnu Thamsanqa Ntuli unikele ngama Wi-Fi Network Tower, emphakathini waseSifuleni, eMsinga.
Lokhu kwenzeke njengoba undunankulu ebeseMzinyathi ngoLwesithathu ngokohlelo lukahulumeni wesifundazwe lwe-Operation Sukuma sakhe obekukhona nesigungu salolu phiko, enkundleni yezemidlalo iSolomon Linda kuWard 18.
UNtuli uncome umoya wokuzinikela kwezinhlaka zamavolontiya akule ndawo ukuqinisekisa ukuphepha komphakathi eMsinga ngaphansi koMzinyathi.
Uthe uhulumeni wesifundazwe uzibophezele ekusebenzisaneni nabaqikelela ukuphepha komphakathi nokugcina umthetho.
Uqinisekise lezi zinhlaka ukuthi uhulumeni wesifundazwe uzokwenza isiqiniseko ukuthi zithola konke ezikudingayo ukuqhuba umsebenzi wazo kalula. Unxuse ukuthi zonke izinhlaka zomphakathi okungosomabhizinisi, abaholi bomdabu ukuthi babhalisele ukuba ngamavolontiya aqinisekisa ukuphepha endaweni. Ekhuluma nabezindaba uveze ukuthi kuyamjabulisa ukuthi balethe intuthuko yalolu hlobo eMsinga njengoba kuyindawo esasele ezintweni eziningi.
“Kuningi okusashoda endaweni yaseMsinga okumele siqinisekise njengohulumeni ukuthi kubakhona. Kule ndawo akukho namanzi, konke nje okwakhona kusasilele emuva,” esho.
UMsinga usenezingxenye zale ndawo ezisasilele kakhulu kwintuthuko. Kwezinye izindawo ayikho iNetwork okube yigxathu elikhulu ukuthi undunankulu anikele ngamaWi-Fi Network Tower kuyona.
