MTHOKOZISI DLOMO
UNDUNANKULU waKwaZulu-Natal, uMnu Thami Ntuli, noNgqongqoshe wezokuThutha esifundazweni uMnu Siboniso Duma, namuhla ngoLwesine bazohlangana nezithunywa zososheshini bamatekisi ahamba amabanga amade ngenhloso yokuthola isixaxululo odabeni lwesiteleka samatekisi esiqhubekayo esifundazweni.
Abanikazi bamatekisi bafunge bagomela ukuthi bazoqhubeka nesiteleka sabo kuze kubuyiswe izimoto zabo ezishaqwe wu-Operation Shanela, ngenxa yokungabi nazo izimvume zokusebenza.
Lesi siteleka esiqale ngeledlule sishaye kwezwela kubagibeli nabadayisa emarenki, sadala nokubambezeleka emigwaqweni njengoba amatekisi abevale imigwaqo kusukela ngesonto eledlule.
Undunankulu uthi uyawuqonda umthelela omubi emnothweni nasemphakathini, owenzekayo ngenxa yalesi siteleka.
“Ngeke sigoqe izandla, sibuke siqhubeka lesi simo esenzekayo lapho izinkulungwane zabantu zingasakwazi ukuhamba zifinyelele lapho ziya khona. Kumele sibeke phambili izakhamizi zaKwaZulu-Natal nabagibeli,” kusho uNtuli esitatimendeni.
