UMHOLI weMarch and March, uNkk Jacinta Ngobese-Zuma uthi isamthusile futhi iyamcasula indaba yokubulawa kukaMnu Douglas “Mfene” Thusini waKwaMashu, oshone ngokudutshulwa beqeda ukuvala izitolo zabaseSomalia eNtuzuma.
UNkk Ngobese-Zuma uthe okwamanje akukuningi azokusho ngoba akakahlangani nomndeni kamufi.
“Ingiphethe kabuhlungu indaba kaMfene ngoba ubelwela umphakathi. Into abeyilwela ngiyayazi nami. Kusanda kushona ingane ephuze iRebooster ebithengwe kuzona lezi zitolo. Manje uma sikhala ngabokufika kuba sengathi sicwasa ngokobuzwe okuyinto engekho. Thina silwisana nobugebengu ababenzayo kuphela,” esho.
UThusini ungomunye wabebehamba phambili ekuqhubeni umkhankaso wokuthi kuxoshwe abokufika abangenamaphepha kuleli. Kuthiwa udutshulwe izolo washona beqeda ukuvala izitolo zabaseSomalia izolo ntambama.
UNkk Ngobese-Zuma, uthe into ebaphatha kabuhlungu, kukhona nabantu abathatha imali kwabokufika bebathembisa ukuthi bazobavikela. Le mali ebizwa ngeProtection Fee, uthe iyona le eyenza abokufika babenenkani yize bazi ukuthi bakuleli ngokungemthetho. Into athe iyamkhathaza ukuthi laba abathatha le mali abazicabangeli kwabona ngoba ngelinye ilanga nabo bazoshona, kusale izingane zabo zixhashazwe abantu bokufika.
