UNGQONGQOSHE wezokuThuthukiswa koMphakathi KwaZulu-Natal uNkz Mbali Shinga uhambele umndeni kaMnu Siyanda Mvelase (27) eNhlungwane, oLundi, namuhla ngoMsombuluko.
Lunyakazise abaningi udaba lukaMvelase, obengumshayeli we-Uber (e-hailing) eGoli, odlule emhlabeni ngesihluku ezinyantisa igazi, ngaphandle kwenxanxathela yezitolo iMaponya, eSoweto, ngoLwesithathu ebusuku.
Kusolwa umbango wemizila phakathi kwabamatekisi nabama-Uber njengembangela yokufa kwakhe. Kusolakala ukuthi udlule emhlabeni ngokudutshulwa, isidumbu sakhe sashiswa nemoto yakhe esigamekweni okusabalale ama-video aso ezinkundleni zokuxhumana.
Ungqongqoshe, ehambisana nezinye iziphathimandla zomnyango wakhe, uhlangane nomndeni wakwaMvelase, wadlulisa amazwi enduduzo. Uthe uhulumeni wesifundazwe uzokwelula isandla ukusiza umndeni ngezinto ezehlukene okubalwa kuzo nokulandwa kwezinsalela zakhe.Â
“Okokuqala nje, umnyango uthathe isinqumo sokuba kujutshwe ithimba losonhlalakahle abazosiza umndeni ngokuweluleka njengoba ubhekene nesimo esinzima. Sikuqaphele ukuthi akukho muntu osebenzayo kulo mndeni.
“Sizwile nokuthi uSiyanda uphume ekhaya enephupho elihle ngekubo. Konke lokho sizokubheka emuva komsebenzi esibhekene nawo kumanje. Umndeni sizokwenza isiqiniseko sokuthi uthola ukwesekwa okusezingeni kulesi sikhathi esinzima,” kusho uShinga.Â
