UNGQONGQOSHE wamaPhoyisa obambile uMnu Firoz Cachalia namuhla uzovakashela imindeni yamaphoyisa amabili abulawe esemsebenzini, ehambisa isiboshwa ebesibuya kovela eNkantolo yeMantshi yaseRoodepoort, eGauteng, ngoLwesihlanu.
Amaphoyisa asekhiphe umehlokaboni ka-R150 000 kumuntu ongaba nolwazi ngomkhondo womsolwa uJabulani Thabang Moyo, nomunye asolwa naye ngalesi sigameko sokubulawa kwamaphoyisa.
Kulesi sigameko esenzeke enkabeni yedolobha iRoodepoort, kuthiwa amaphoyisa adutshuliwe, ase ephucwa izibhamu zawo zomsebenzi.
Kusolwa ukuthi uMoyo ube esebaleka ngayo imoto yamaphoyisa, etholwe isishiyiwe ndawana thize. UMoyo uyanyaniswa nesigameko sokubamba inkunzi ibhizinisi ngoNhlolanja (February) ka-2023.
