WELULE isandla, waphosa esikhwameni senyuvesi okuhloswe ngaso ukusiza izitshudeni ezibhekana nezinselelo zokukhokhela izifundo zazo. UMnu Mlamuli Buthelezi ofunde eMangosuthu University of Technology kusukela ngo-1984, ufake umnikelo ka-R100 000 kulesi sikhwama sokufukula abaswele.
UButhelezi owenza iziqu zeMechanical Engineering, uthe kwakuyisifiso sakhe kwakudala ukwelula isandla, ikakhulukazi uma kuthinta izitshudeni.
“Ngiyathemba ukuthi le minikelo ehlanganiswa yinyuvesi, izokwazi ukuhlangabezana nezinkinga ezibhekene nezitshudeni kwezemali,” kusho uButhelezi.
UButhelezi ungumsunguli we-Oak Tree Technologies, okuyinkampani yolwazi elekelela onjiniyela abenza imisebenzi yomphakathi ehlukahlukene. Uveze ukuthi ukuxazululeka kwezinkinga zezitshudeni, yikhona okwenza kunciphe nezinga lokungenzi kahle kwezinye ezifundweni zazo.
“Inhloso yami wukuthi ngisize iMangosuthu ekwakhiweni kwalesi sikhwama ukuze sikhule, silekelele inqwaba yezitshudeni unyaka nonyaka, hhayi kanye bese kuphela kanjalo,” esho.
Ngokusho kwenyuvesi, uButhelezi ulwesekile lolu hlelo nangonyaka ophelile ngomnikelo ka-R66 900. Ithi inyuvesi iyazigqaja ngoxhaso lwakhe olukhula unyaka nonyaka.
