UNQABE ibheyili owesilisa waseShayamoya, eRichmond osolwa ngokubulala abesifazane ababili abangabangani, maqede wabagqiba ehlathini.
UMnu David Moholo (59), ubevele eNkantolo yeMantshi eRichmond ngoLwesithathu, bekulindeleke ukuba afake isicelo sebheyili.
UMoholo ubhekene namacala amabili okubulala uNkz Zinhle Mbanjwa (44), noNkz Pinky Shelembe (33), elokutholakala nesibhamu esingekho emthethweni, nelokuqhumisa isibhamu emphakathini.
NgoLwesithathu inkantolo ibigcwele ichichima amalungu omphakathi abeyokweseka umndeni wakwaMbanjwa nowakwaShelembe, uMoholo evela okokuqala. Icala lihlehliselwe umhla ka-28 kuSephtemba.
ILANGA libike kabanzi ngalolu daba ngoLwesine emuva kokutholakala kwezidumbu zikaNkz Mbanjwa noNkz Shelembe.
Imindeni iveze ukuthi laba bagcina ukubonakala beyotheza ehlathini eliseduzane nasemakubo. Kubikwe ukuthi uMoholo ubethandana noNkz Mbanjwa, kodwa ubesemalile engafuni ukwamukela, emphoqa ukuba baqhubeke.
Kuvele ukuthi ngeSonto mhla ka-16 Agasti, okuwusuku olwandulela okwagcina ukubonakala ngalo abafi, uMoholo wahlasela isoka elisha likaNkz Mbanjwa, elisola ngokumthathela intombi.
ILANGA Lempelasonto likhulume noNkz Busisiwe Shelembe ongudadewabo kaPinky, othe kubajabulisile ukuthi uMoholo anqabe ukufaka isicelo sebheyili. Uthe bewumndeni bayafisa ukuba aqhubeke nokugqunjwa ejele, kuze kuba kufika ekugcineni.
