KUTHIWA uthukuthele uyaveva uMengameli Cyril Ramaphosa ngesinqumo soMkhuzi wamaPhoyisa kuzwelonke uLt-Gen Fannie Masemola, sokubuyisela kubaphenyi baKwaZulu-Natal amadokodo awu-121 abesehhovisi lesekela lakhe uLt-Gen Shadrack Sibiya.
Nakuba izakhamizi nabamaqembu epolitiki besishayele ihlombe isenzo sikaMasemola, lokhu akwehlanga kahle kuRamaphosa njengoba ekholwa wukuthi kuzophazamisa ukusebenza kweKhomishaka kaJudge Mbuyiseli Madlanga, ephenya ngezinsolo zoMkhuzi wamaPhoyisa eKZN, uLt-Gen Nhlanhla Mkhwanazi.
Ezinyangeni ezedlule, kwasuka omkhulu umsindo ngemuva kwenkulumo kaMkhwanazi, esola osopolotiki nezinye izikhulu zeminyango kahulumeni, okubalwa kuzona uNgqongqoshe wamaPhoyisa uMnu Senzo Mchunu, ngokusebenzisana nezigilamkhuba. Wasola uMchunu ngokugxambukela ekusebenzeni kophiko oluphenya amacala athinta ukubulawa kosopolitiki, okwaholela ekutheni athi ‘maluhlakazwe’.
Ngemuva kwenkulumo kaMkhwanazi, uMasemola waveza ukuthi uSibiya waphula umyalelo wakhe ngokuhlakaza lolu phiko, “ngokuyalelwa nguMchunu”.
UMchunu, osamisiwe emsebenzini njengoba izintambo zibanjwe nguSolwazi Firoz Cachalia, usolwa ngokuvikela abathile abanegama, abasolwa ngokuthinteka ezigamekweni zokubulawa kosopolitiki. Naye uSibiya umisiwe emsebenzi njengoba kusenziwa uphenyo.
Ngakolunye uhlangothi, uCachalia kuthiwa naye akasithokozelanga isinqumo sikaMasemola sokubuyisela lawa madokodo KwaZulu-Natal.
UMnu Vincent Magwenya okhulumela iHhovisi likaMengameli, uthe uRamaphosa ube nengxoxo noCachalia, ezwakalisa ukukhathazela ngesikhathi okuhanjiswe ngawo lawa madokodo njengoba maduze kuzoqala ikhomishini ayiqokile ukuphenya ngezinsolo zikaMkhwanazi.
“Lawa madokodo awumgogodla ophenyweni lwekhomishini kaMadlanga. Umengameli ulindele ukuthi abaholi bamaphoyisa basebenzisane nongqongqoshe obambile nekhomishini ukuze avikele isithunzi zokusebenza kombutho,” kusho uMagwenya.
