UNDUNANKULU waKwaZulu-Natal, obuye ebe nguSihlalo weNkatha Freedom Party (IFP), esifundazweni, uMnu uThami Ntuli, usephinde wahlaba ikhwelo lokuthi kube nokubuyisana kweqiniso, phakathi kwe-African National Congress (ANC) neNkatha.
Ubekhuluma emgubhweni woSuku lweNkululeko, obuKwaDukuza, ngeSonto.
UMphemba ubehamba noSomlomo wesiShayamethetho, uNkz Nontembeko Boyce, uSihlalo kaZwelonke we-IFP, obuye abengumholi wayo esiShayamthetho saseKZN, uMnu Blessed Gwala, namanye amalungu esigungu sesifundazwe.
Eqeda ukuhlonipha iNkosi u-Albert Luthuli ngokubeka izimbali ethuneni layo njengoba yangcwatshwa khona KwaDukuza, eGroutville, uNtuli uthe uMadlanduna (iNkosi uLuthuli) nomholi we-IFP ongasekho, iNkosi uMangosuthu Buthelezi, babengabangani abakhulu.
INkosi uLuthuli yaba nguMengameli we-ANC kusukela ngo-1952 kwaze kwaba iyashona ngo-1967.
“Ubungani bukaMadlanduna noShenge babusho ukubekezelelana ngokwepolitiki, ukuthula, ukwazisana nobumbano.
“UMntwana waKwaPhindangene, uma eya eFort Hare, wayedlula lapha emzini weNkosi uLuthuli, nalapho esebuya futhi, wayedlula ambone uMadlanduna, ngoba kwakungabantu abazisanayo,” kusho uNtuli.
UNtuli wethula le nkulumo yokunxenxa ukubuyisana kwangempela nje, iNkosi uMangosuthu Buthelezi yaze yahamba emhlabeni ikhala ngokuthi kukhona “okusasele” phakathi kwe-ANC ne-IFP.
UMphemba, uthe uyakwemukela ukuqalwa kabusha kophenyo ngokufa kweNkosi uLuthuli, oluqhubekayo eNkantolo eMgungundlovu.
Umndeni weNkosi uLuthuli, nobuholi be-ANC, bathi kabakholwa ukuthi uMadlanduna wadlula emhlabeni ngoba eshayiswe yiguzu.
Uphenyo lokuqala olwenziwa iNkosi uLuthuli isanda kukhothama ngo-1967, kuthiwa lwaveza ukuthi yashona ngenxa yokulimala ngoba yashayiswa yiguzu.
Umndeni uveza ukuthi iNkosi uLuthuli, yayinamanxeba okushaywa ezingalweni, okukhombisa khona ukuthi yalimala ivika. UMnu Jeff Radebe, ojutshwe ukuba ahole ithimba elizohlela kabusha i-ANC eKZN, nguyena ogcine ukwenza izethulo esithangamini esibheka kabusha, ukushona kweNkosi uLuthuli.
Omunye wabaphenyi abakhona kulesi sithangami, ukhale ngokuthi abantu okufanele ngabe bayabizwa, babe ngofakazi, abanye babo kabasekho emhlabeni.
menzi.jele@ilanganews.co.za
