UNDUNANKULU waKwaZulu-Natal uMnu Thami Ntuli uthi uxoxisana neHhovisi likaMengameli Cyril Ramaphosa ukuthola imali yokwelekelela abantu abakhahlanyezwe yizikhukhula esifundazweni.
Bathathu abantu osekuqinisekisiwe ukuthi bashonile ngenxa yezimvula ezinamandla ngempelasonto, kwathi izinkumbi zasala dengwane.
Bese kuyisonto lesithathu kugadla izimvula ezinkulu esifundazweni, zidlula nemiphefumulo yabantu. UNtuli uthe umonakalo odalwe yizimvula ulinganiselwa ku-R1 billion.
“Ngike ngalumana indlebe nomengameli, lapho ethe uzoxhumana neminyango kahulumeni ukuze kutholakale imali yokusiza izisulu zezikhukhula,” esho.
Namuhla ngeSonto uNtuli uhambele izindawo ezehlukene, okubalwa kuzona iNanda, eyohlola umonakalo, lapho ethembise khona izisulu ukuthi bazokwenza izaba ukuthi zibe nophahla lokufihla ikhanda.
