UGXEKE abashaye indiva izimpawu zokuhlukumezeka kuka-Nkz Nontobeko Cele (23) ogwazwe wabulawa umyeni yakhe uMnu Sibusiso Ntaka ngoLwesibili olwedlule uNdunankulu waKwaZulu-Natal, uMnu Thami Ntuli.
UNtuli ubekhuluma namuhla emngcwabeni ka-Nkz Cele oqhubekayo ehholo lomphakathi eMandawe.
Uthi ukholwa ukuthi ukube abasondelene nalentokazi baphumela obala ngezimpawu zokuhlukumezeka kwayo abebezibona bekuzoshaya ukhisimusi sisadla anhlamvana.
“Siyawugxeka umphakathi nezihlobo owathula wangangenelela ukukhuza lesi sihlava sokuhlukunyezwa komuntu wesifazane.
Mhlawumbe ubezowugubha nathi ukhisimusi ukube kukhona okwenziwa ukumhlenga ekuhlukunyezweni ekuthiwa ubebhekene nakho,” esho.
Udlulise amazwi enduduzo kubo emndenini nababesondelene nomufi, wabe esenxusa amalungu omphakathi ukuba abambisane kuliwe nesihlava sokuhlukunyezwa kwabesifazane.
