UNDUNANKULU waKwaZulu-Natal uThami Ntuli ugqugquzela intsha ukuba ishebe ezemfundo nezemidlalo ukuze iphumelele empilweni. UNtuli ubekhuluma ngesikhathi kuvulwa ngokusemthethweni iKZN Premier’s Netball Cup ngoLwesihlanu eVictoria Mxenge Indoor Complex, esigcemeni sakwaD eMlazi.
Lo mqhudelwano udlalwa yibona bonke omasipala besifundazwe kanti uzoze usongwe ngeSonto. Uyaqala ukuba khona kulo nyaka kanti uNtuli wethembisa ukuthi uzokuba khona minyaka yonke.
“Ngijabule kakhulu ukuba khona kwalo mqhudelwano oqanjwe ngami. Kuyinto engithokozise kakhulu. Ngizohamba ngingqongqoza ngiwufunele abaxhasi ukuze ukhule. Ngiyacela ngane zami ukuba nithi nidlala nibe nifunda.
“Lapha kuMnyango wezeMidlalo esifundazweni sinoDokotela Sifunda oyinhloko yawo naye obeyingane njengani. Siyafuna ukubona abanye oBongiwe Msomi (obewukaputeni weqembu lesizwe leNetball) abazophuma lana. Abazodlala ngokuzimisela sizobabona emaqenjini esifundazwe azokube edlala kwiTelkom Netball League ezoqala maduze, ” kusho uNdunankulu.
Ukuvulwa kwalo mqhudelwano bekuhanjelwe nguNgqongqoshe wezeMidlalo esifundazweni, uMntomuhle Khawula, uMengameli weKZN Netball uGugu Ngema, uMengameli weKZN Sport Confederation uThami Mchunu nezinye izikhulu.
