LUCKY CAIN
UHLANGANE nezimeya zaKwaZulu-Natal ngoLwesihlanu e-Inkosi Albert Luthuli International Convention Centre (ICC), eThekwini undunankulu wakesi sifundazwe, uMnu Thami Ntuli (osesithombeni) ngenhloso yokucaba indlela eyaphambili ekulweni nezinkinga ezithinta ama-spaza nendlela okumele abanikazi bawo baqhube amabhizinisi abo ngayo.
Lo mhlangano ulandela umsindo ngokwanda kwezigameko zokuthengiswa kokudla okungalungile kulezi zitolo, iningi lazo eziphethwe ngabokufika.
Ekhuluma kulo mhlangano uNtuli, uthe uhlelwe ngemuva kwesonto uNgqongqoshe wezoHulumeni baseKhaya nezoMdabu, uMnu Velenkosini Hlabisa, esayine umthetho obhekelela ukusebenza kwalezi zitolo nemigomo okumele zisebenze ngaphansi kwayo.
Uthe kumqoka ukuba uhulumeni wesifundazwe usheshe ukusukumele lokhu ukuze zingaqhubeki nokwanda izigameko zokuthengiswa kokudla okuphelelwe yisikhathi nokunobuthi. “Sike saphawula ngomndeni waseCambana, eMzimkhulu, lapho kushone khona izingane ezintathu nenja yakhona kanti ugogo yena ubesaxinekile esibhedlela. Siwuhulumeni sikhathazekile ngalesi sigameko nezinye osekubikiwe ngazo ezindaweni ezahlukene,” kusho uNtuli.
Uthe abanikazi bezitolo abephula umthetho bazobhekana nengalo yomthetho. Uthe nakuba umthetho kumele udlale indawo yawo, kodwa kumqoka nokuthi uhlelo lwabo lubandakanye ukufundisa abanikazi balezi zitolo, kuvame nokuhlolwa kokusebenza kwazo, kube nemikhankaso yokuxwayisa umphakathi ngezinto okumele uziqaphele ngokudla okonakele.
Uveze nokuthi bazimisele ngokubuyisela lezi zitolo ebantwini baseNingizimu Afrika ukuze nomnotho wezindawo usimame.
lucky.cain@ilanganews.co.za
