UWUGUQULE isigubhukane umcimbi wokugubha usuku lwakhe lokuzalwa nabesifazane uNkz Welile Mchunu wodumo lwezinkulumo eziqoshiwe (voice notes) ezinkundleni zokuxhumana kwaba wumcimbi wokuhlopha umculi kamaskandi oshone ongozini yemoto uScebi “Inkosi Yamagcokama” Dlamini.
Lo mcimbi ebekade useKhethelo Life Style endaweni yaseDukuduku eMtubatuba ngoMgqibelo ebusuku, bonke abaculi abafikile batshelwe ukuthi bangaphumi esteji bengayiculanga eyodwa yezingoma zeNkosi Yamagcokama njengophawu lokumhlonipha amagalelo akhe emculweni kamaskandi.
Bonke abaculi okubalwa kubona uKhuzani, uJumbo, uSaliwa, uNjabulo Langa, uMjolisi, uNjoko, uMayogathi nabanye abaningi- balandele umyalelo wesicelo sikaWelile.
Echaza uWelile ngalolu shintsho, uthe yingoba iNkosi Yamagcokama nayo beyimenyiwe emcimbini wakhe yathunyelelwa nesikhathi ezongena ngaso.
Uthi alubange lusafika usuku kuyona njengoba ishone engozini yemoto iyakomunye umcimbi ngoMgqibelo ebusuku eRichards Bay.
“NgeSonto ubezofika emcimbini wami besivumelene. Ngakho ke ukulimala kwakhe kungiphazamisile emoyeni wami ngabona ukuthi akuwona umqondo omuhle ukujabulela ukugubha usuku lokuzalwa kodwa elinye lamaciko ebelithembise ukungiseka kulo mcimbi selisale endleleni,” kusho uNkz Mchunu.
