UMHOLI wmaRoma aKhatholika, emhlabeni jikelele, uPope Leo XIV, uthi sekwanele, akukhulekelwe ukuthi iphele impi eqhubeka eMiddle East. Ubenenkonzo yokuqala yePhasika, eSt. Peter Square, eVatican, njengoba engene kulesi sikhundla ngenyanga kaNhlaba (May), wangonyaka odlule.
Inkonzo ibingeSonto, kanti uPope uqale ngokwethulela isigqoko uPope Francis, angene esikhundleni sakhe, owagcina ukubonakala emphakathini, ngePhasika langonyaka odlule, sekusele kancane ukuthi ashone.
Impi yaseMiddle East, yaqhathwa wukuhlasela ngemicibisholo kwezwe lakwa-Israeli, lihlasela elase-Iran, ngomhla ka-28 kuNhlolanja (February), walo nyaka. UPope Leo, uthe amaKhatholika awu 1,4 billion, awaholayo umhlaba wonke jikelele, mawakhuleke, azile kuze kube wumhla ka- 11 kuMbasa (April).
“Umhlaba ugubuzelwe yifu elimnyama, njengoba kuphuma imiphefumulo engenacala eMiddle East. Laba abasemandleni, abalwele ukuthula nokubuyisana, hhayi ukukhwezela impi,” kusho uPope Leo, etshela izinkumbi ebezithamele inkonzo abeyihola ngeSonto.
UPope Leo XIV, ungowokudabuka eMelika, okuyizwe elisakhaleni lalempi, njengoba leseka izwe lakwa-Israeli. Impi yaseMiddle East, isibe nomthethela ongemuhle njengoba intengo kawoyela no-petrol, yenyukile ezingxenyeni eziningi zomhlaba.
