UKUBE iSistine Chapel, eVatican City, eRome, inomlomo wokukhuluma, ibiyoxoxela nezizukulwane ezizayo indaba emnandi, njengoba izolo, ngoLwesithathu, bekuqala uchungechunge lokuqopheka komlando, kuvotelwa uPhapha ka-267, emlandweni wamaRoma aKhatholika. Bawu-135 oCardinal bamaKhatholka, abavotayo njengoba ngokusho kukaSolwazi S’mangaliso Khumalo, owengamele uPhiko lwezeNkolo, e-University of KwaZulu-Natal, kungathatha izinsuku eziphakathi kwezine kuya kwezinhlanu, ukuvota.
Izolo ngoLwesithathu, kuqalwe ngehora lesine ntambama ukuvota, kanti kuzoqhubeka kuze kubekhona oyedwa koCardinal abavotelwayo, othola amavoti awu-89, kuya phezulu.
Kuqalwe ngomkhuleko ekuseni, wabo bonke oCardinal abavotayo, owaziwa ngokuthi yi”Holy Mass”, ngaphambi koba kuqalwe ukuvotwa, ntambama.
Uma echaza uSolwazi Khumalo. uthi kuvotwa zonke izinsuku, ekuseni nantambama, kuyenzeka kuthathe izinsuku eziningi, inqubo nje uma engakatholakali uCardinal kwabangenele ukhetho, ovotelwe yiningi, elifinyelela ku 89, kuyolokhu kuqhutshekwa kuvotwa.
“Kwake kwenzeka emlandweni kwavotelwa uPhapha iminyaka emithathu. Into eshoyo ukuthi uPhapha omusha usetholakele, yintuthu. Kunesitofu esibekwe eSistine Chapel, esinoshimula. Amaphepha okuvotwe kuwo, uma amavoti esebaliwe, afakwa kusona lesi sitofu. Uma uPhapha engakatholakali, kuthelwa impuphu emnyama, eyenza intuthu ephumayo kushimula, ibe mnyama. Uma sekukhona uCardinal osethole amavoti awu-89, nangaphezlu, amaphepha okuvotwe kuwo, athelwa ngempuphu emhlophe, bese eyashiswa, kuphume intuthu emhlophe kushimula. Le ntuthu emhlophe, izobe isho ukuthi uPhapha omusha usetholakele. Ngo-2013 kwavotwa izikhawu eziwu-5, kwaze kwaba uPope Francis uyatholakala, ngamavoti.
“Uma esemenyezelwe uPhapha omusha, unikwa ithuba lokuba athandaze yedwa. Ngemuva kwalokho uzobe esekhetha igama afuna ukubizwa ngalo, kodwa kufanele kube ngeloMpriste owake waba namava namagalelo ancomekayo, eBandleni lamaRoma aKhatholika, kungaba nguPope Francis, uPope Benedict, uPope John Paul, uPope Victor, njalo-njalo.
Uma esemenyezelwe uPhapha omusha, ozobe esenikwa imijiva yakhe emhlophe, kusuka ezicathulweni kuze kuyoshaya ekhanda. Uzobe esethulwa kwizinkumbi zamaKhatholika njengoba abhabhadisiwe awu 1,4 billion umhlaba wonke. E-Afrika nje iyodwa awu 281 million amaKhatholika abhabhadisiwe, njengoba kumaCardinal avotayo, awu-17 avela emazweni ase-Afrika,” kuchaza uSolwazi uKhumalo.
Amehlo awasuki komabonakude emazweni omhlaba, njengoba amaKrestu emagange ngokuzwa ukuthi ngubani “uBaba wamaKhatholika” omusha.
menzi.jele@ilanganews.co.za
