KUNENGEBHE emphakathini waseMbindolo, eMsinga, ngokuthi hleze kuqubuke impi yomndeni emuva kokufa kwabantu abane, okusolakala ukuthi baphuze umamsamo onobuthi komunye wemizi yakwaMvelase obunomcimbi ngenyanga edlule.
Umamsamo wutshwala obufakwa okhambeni oluncane, bubekwe emsamo uma kade kunomcimbi wesintu. Ngokujwayelekile buphuzwa ngakusasa ngamalungu alowo omndeni osuke unomcimbi.
Kulesi sehlakalo esenzeke ngoNtulikazi (July) kushone uMnu Siphiwe “Ndevu” Mvelase ongubaba wekhaya, uNkk Ndeshi Mbatha (uMaMvelase), uNkk Ntombifuthi Majozi (uMaMvelase) (osesithombeni), noMnu Mgwaqo Mvelase.
ILANGA likhulume noMnu Sandile Mbatha (27) ongumzukulu kaNkk Majozi. Uthe isimo kasisihle endaweni ngenxa okungazitholi izimpendulo ukuthi kube yini imbangela yokufa kukaninakhulu namanye amalungu omndeni.
“BengiseGoli ematohweni, ngathola ucingo oluthi ugogo uphathekile, ukhala ngobuhlungu eqolo. Ngisalalele lokho, kuthiwe akasaboni emehlweni, nasezindlebeni akasezwa. Kuthiwa ukugula kumxine ngosuku aphuze ngalo umamsamo.
“Esikutholayo wukuthi ubaba wekhaya uNdevu ukhiphele laba utshwala, okuthe uma sebebuphuzile, baqalwa wukugula okufanayo.
“Yena ufe ujuqu. Ngokuzwa kwami kuthiwa yenziwe imizamo yokuthi kuphunywe kuyothengwa ubisi ukuze umufi uNdevu aphalaze abekudlile, kodwa ilungu elithile lomndeni lakunqaba lokho, waze wafa.
“Isimo sibi. Ngingalibeka ngembaba elokuthi ikhombene, ngeke kufe abantu befele ubala kuthuleke. Kugcine kuthiwa udaba lusenkosini, kuze kube yimanje asikaze sizwe lutho,” kusho uMbatha.
Induna yesigodi, uMnu Mafika Sithole, itshele ILANGA ukuthi iyalwazi lolu daba, lwabikwa kuyona.
“Isimo kasisihle emndenini wakwaMvelase emva kokufa kwamalungu. Kalikho icala elivulwe, kodwa umndeni ubufikile uzokhala, ufuna ukwazi ukuthi kwenzeka kanjani ukuthi abantu baphuze utshwala kulo mndeni obunedokwe (umcimbi omncane) kuwo, bese beyafa.
“Umama wakulo muzi ulandulile ukuthi khona ulwazi analo ngokufa kwabantu. Uthe bebukhona utshwala, kodwa abantu baphuze obufike nobaba wekhaya, uNdevu, hhayi obebugaywe nguye,” kusho induna.
Iveze ukuthi ukulalelwa kodaba kuyaqhubeka njengoba kulindeleke ukuba ihlangane nemindeni ngoLwesithathu.
INkosi yesizwe saKwaMajozi, eMsinga, uZiphokuhle Majozi, ithe iyalwazi lolu daba, induna uSithole ilubikile. Elinye ilungu lomndeni, uMnu Mfiliselwa Mvelase, litshele ILANGA ukuthi umndeni uhlukene phakathi ngenxa yale simo.
“Kasisakwazi ngisho ukuya emndenini wasekhaya, siyesaba. Kumele ngabe ngoLwesine sikhumule inzilo, kodwa kakwenzekanga lokho ngoba kasisathembene,” esho.
UNkk Florence Mvelase uMaButhelezi, utshele leli phephandaba ukuthi uyazi ngezinsolo ezibhekiswe kuye.
“Sengithembe uNkulunkulu kukho konke okuyokwenzeka empilweni yami. Ngikhuluma nje, amalungu omndeni kawasalubhadi lapha ekhaya, kuvalwe ngisho izingane ezincane ukuba zize zizothenga lapha ekhaya njengoba nginesitolo.
“Mina engikwaziyo ngalolu daba, ubaba wekhaya uNdevu ufike ekhaya kuwuLwesine ezolungiselela itiye lendodana yakhe. Ufike wathi uzizwa enobuhlungu eqolo, kwaba wukuthi ukufa kuhamba naye kwaze kwaba yiSonto. Sengiphenduke inhlekisa endaweni, ngibizwa enduneni ngibekwa phambi kwamadoda, ngiquliswa icala. Indoda yami ngizoyizilela noma bangathini ngoba yona iyazi ukuthi kangizange ngiyibulale,” kusho uMaButhelezi
