IMIPHUMELA kamatikuletsheni isazoqhubeka nokushicilelwa emaphephandabeni nakuba kusenomdonsiswano ngokushicilelwa kwayo.
Okhulumela uMnyango wezeMfundo eyiSisekelo uMnu Elijah Mhlanga ukuqinisekisile ukuthi imiphumela kamatikuletsheni izoshicilelwa ngomhla ka-13 kuJanuwari, kanti abamaphephandaba abafisa ukuyishicilela bavumelekile ukukukwenza lokhu.
Usho lokhu nje, kusenomdonsiswano phakathi kwawo umnyango ne-Information Regulator (IR), ezama ukuvimbela umnyango ukuba ungaqhubeki nohlelo lokushicilelwa kwale miphumela emaphephandabeni.
I-IR ikholwa wukuthi ukushicilelwa kwale miphumela kwephula ilungelo lokuvikelwa kolwazi lomuntu ngokuthi lungashicilelwa ngaphandle kwemvume yakhe, elivikelwe ngaphansi komthetho obizwa ngeProtection of Personal Information Act (Popia).
UMhlanga uthi ngoLwesihlanu umnyango ufake amaphepha eNkantolo eNkulu ePretoria uphikisa umyalelo we-IR wokuba ungaqhubeki nokuyishicilela imiphumela.
UMhlanga uthi njengoba umnyango usuye enkantolo, lokho kusho ukuthi lo myalelo we-IR awukazosebenza kuze kube inkantolo ikhipha isinqumo.
