UZOBUYELA enkantolo ngoMsombuluko mhla ka-13 kwephezulu ukuzofaka isicelo sebheyili uSayitsheni Fannie Nkosi obevele enkantolo yasePretoria North kulandela ukuboshwa kwakhe ngoLwesihlanu.
UNkosi uvele kafushane kule nkantolo ngaphambi kokuthi lihlehliselwe isonto elizayo lapho kulindeleke ukuthi afake isicelo sebheyili.
Umbuso ukuvumelile ukuthi kuhlehliswe ukufakwa kwesicelo sebheyili ngenhloso yokuqoqa obunye ubufakazi.
UNkosi ubhekene namacala ahlukene okubalwa kuwo awokweba, ukuphazamisa ukusebenza komthetho, ukutholakala nezinhlambu ngokungemthetho nebhomu (hand grenade).
Uboshwe ngoLwesihlanu ngemuva kokuba amaphoyisa egasele emzini wakhe osePretoria athola namadokodo phakathi kwezinye zezinto ezitholakale emzini wakhe.
Okhulumela amaphoyisa uBrigadier Athlenda Mathe uthe ngesikhathi amaphoyisa egasela emzini kaNkosi ePretoria aphinde amfica ephule nemigomo yokugcinwa kwezibhamu njengoba bekukhonq ebezibekiwe ngendlela engahambisano nomthetho.
UNkosi oyilungu lophiko lwe-Gauteng Organised Crime wethule ubufakazi kwikhomishana kaMadlanga lapho kuvele khona amanyundululu ngokusebenza kwakhe kulolu phiko nanobudlelwano bakhe nabanye abasolwa ngokuba yimigulukudu yezigebengu.
