ZIYAQHUBEKA izinhlelo somcimbi wokuvula ngokusemthethweni kweSishayamthetho saKwaZulu Natal enkundleni yezemidlalo iWoodburn eMgungundlovu nakuba iSilo uMisuzulu kaZwelithinisike sazwakalisa ukukhathazeka ngezokuphepha kule nkundla.
USomlomo weSishayamthetho uNkz Nontembeko Boyce uveze ukuthi bayaqhubeka nezinhlelo zokuvulwa kweSishayamthetho kule nkundla okuzokwenzeka izinsuku ezimbili zilandelana umhla ka-27 ngoLwesine nomhla ka-28 ngoLwesihlanu kuNhlolanja.
Kuwumgomo osemthethweni weSishayamthetho saKwaZulu Natal ukuthi ukuvulwa kwale ndlu kuqale ngenkulumo yeSilo ngaphambi kokuthi kulandele ekandunankulu wesifundazwe.
Ngeledlule kusabalale imibiko ethi iSilo kasigculisekile ngezokuphepha zale nkundla njengoba iyinkundla evulelekile.
UNkk Boyce ekhuluma esithangamini sabezindaba izolo ngeSonto mayelana namalungiselelo alo mcimbi wezinsuku ezimbili uthe konke kuyaqhubeka ngohlelo njengoba sebeke bahlangana neSilo.
“NgoLwesine sihlanganile neSilo sasibikela ngezinhlelo zethu saphinde sasicacile nangohlelo lwezokuphepha olukhona lokuqinisekisa ukuphepha kwaso nazo zonke izicukuthwane zethu,” kusho uNkz Boyce eveza ukuthi iSilo silwamukelile uhlelo obelwethulwa nakuba engeke ande kakhulu ngalo njengoba engagunyaziwe ukuthi aphawule ngohlaka lwezokuphepha.
UNkk Boyce uphinde wacacisa nangodaba oluthinta imali ezosetshenziswa ukuhlelo lo mcimbi wezinsuku ezimbili.
Uthe bazolandela umgomo wokusetshenziswa kwemali abawubekelwe njengoba bebekelwe imali ewu-R4 million ukwenza lo mcimbi izinsuku ezimbili.
“Ngingakusho ngingananazi ukuthi ngeke sifinyelele kulesi samba njengoba sihlela ukusebenzisa engaphansi kakulu kwayo,” kusho yena.
UNkk Boyce uthe kulezi zinsuku ezimbili balindele izicukuthwane eziwu-2000 zamazinga ahlukene okuhlanganisa amabutho, omama, amatshitshi, amaphoyisa, abezindaba nezinye izikhulu zikahulumeni nezinhlaka zawo.
Inkundla iWoodburn iyona ebekusingathelwe umcimbi wokuvulwa kwesiShayamthetho ngemuva kokhetho lapho kwethulwa ngokusemthethweni uNdunankulu uMnu Thai Ntuli.
NgoLwesine kulindeleke ukuthi iSilo uMisuzulu kaZwelithini akhulume nesizwe bese kuthi ngoLwesihla uNtuli athule inkulume yakhe yezinhlelo zikahulumeni uma kuqala unyaka-mali ka-2025 no-2026 ngoMbasa.
Nkk Boyce ube eseveza ukuthi ngomhla ka-4 kuNdasa amalungu eSishayamthetho azothola ithuba lokuba nenkulumo-ngxoxo mayelana nenkulumo kaNdunankulu ezindlini zeSishayamthetho eMgungundlvu.
