UTHOLE umsebenzi omusha usopolitiki wodumo uDkt Mbuyiseni Ndlozi osanda kuphumela obala ngokulaxaza i-EFF nepolitiki yamaqembu eNingizimu Afrika.
UNdlozi wethulwe ngokusemthethweni njengomsakazi omusha ozokwethula uhlelo lwasemini yasekuseni phakathi nezinsuku esiteshini esizinze eGauteng iPower FM.
Uzoqala ngomhla ka-3 kuMarch ukwethula uhlelo iPower Talk olungena phakathi kuka 9 ekuseni no-12 emini.
Kuzokhumbuleka ukuthi bese kunesikhathi engabonakali kwi-EFF kulandela izinsolo zokumiswa kwakhe okwathatha isikhathi ukuthi leli qembu liziqinisekise.
Kwenye yezingxoxo asanda kuzwakala kuzona uNdlozi wakuqinisekisa ukumiswa kwakhe yileli qembu waveza nokuthi phakathi kwezinto amiselwa noza wukusebenzisana neMK Party nokufihlela ubuholi ngodaba oluthinta ukushiya kukaMnu Floyd Shivambu owabe eyiPhini likaMengameli walo.
Engxoxweni abe nayo ne-SABC wakuchitha ukusebenzisana neMK Party wakucacisa ukuthi akakaze asebenzisane naleli qembu njengoba ethi lezi zinsolo zingamampunge futhi kazinasisisekelo.
Ngakwelinye uhlangothi wakuqinisekisa ukuba nolwazi ngokushiya kukaShivambu kodwa wakuveza nalapho ukuthi kwakungekona okwakhe ukubikela ubuholi be-EFF njengoba udaba lwabe kungolukaShivambu futhi kunguyena owabe enegunya lokubika ngokushiya kwakhe. Kusukela kuzwakale izindaba zokujoyina lo msakazo baningi abacoshe ithuba bamhalalisela ngaleli gxathu aselithathile lokungena emkhakheni wezokusakaza.
