OWAKE waba ngumkhulumeli weSilo uMisuzulu kaZwelithini, uMntwana u-Afrika Zulu, waseNdlini yasoNkweni, usekhuze ibuya, wanikwa esinye isikhundla, eNdlunkulu kaZulu.
Ngokwesitatimende esikhishwe yiNdlunkulu kaZulu, uMntwana u-Afrika, uqokwe yiSilo esikhudleni sephini leNxusa laseNdlunkulu (Deputy Royal Chancellor). Uzoba yiphini likaMnu Malusi Zondi.
ISilo sithi siqoke uMntwana u-Afrika kulesi sikhundla ngenhloso yokuqinisa nokuphucula ukusebenza kweNdlunkulu. Sithi uMntwana u-Afrika, unesipiliyoni ezindabeni ezithinta iNdlunkulu, njengoba wake waba ngumkhulumeli weSilo, neNdlunkulu phambilini.
Uzophinde abe yilungu lomkhandlu wasendlunkulu, okumenyezelwe ukuthi uzokwenganyelwa nguNdunankulu kaZulu, uMfundisi Thulasizwe Buthelezi. Amanye amalungu alo mkhandlu, yiPhini likaNdunankulu kaZulu, iNkosi uPhathisizwe Chiliza, yiNxusa leNdlunkulu kaZulu, uZondi, nguMkhulumeli weNdlunkulu, uMntwana uThulani Zulu, noMntwana uNathi Zulu, omele iSilo eNdlini yabaHoli boNdabu KwaZulu-Natal.
UMfundisi uButhelezi uhlalalisele uMntwana u-Afrika, wathi ayaziwa amagalelo akhe.
