AMLAHLE wonke amacala abethweswe wona uSihlalo weNFP ophinde abe nguNgqongqoshe wezokuThuthukiswa koMphakathi kwaZulu-Natal, uNkz Mbali Shinga, owanqaba umyalelo weqembu ukuthi avotele ukungabethembi ubuholi bukaNdunankulu wakulesi sifundazwe, uMnu Thami Ntuli, ngoZibandlela nyakenye.
ILANGA lithole ngomthombo walo ongashayi eceleni ukuthi udaba lukaShinga obeluphethwe yisigungu esiphezulu sokuqondisa ubugwegwe ngaphakathi kuNFP luze lwaphothulwa ebusuku izolo. Ilanga linawo umbiko ochaza ngokulahlwa amacala kukaNkz Shinga. Kuwona kuvela ukuthi ikomoti lisebenze ngokuzimisela ukuqinisisekisa ukuthi umthetho uyalandelwa ngokungakhathali kumalungu, ngaphandle kokubheka isikhundla noma ihhovisi okulona.
Njengoba elahlwe ngamacala uNkz Shinga, kuseza isigaba sesibili ngokugwetshwa kwakhe. Esitatimendeni kuthiwe isigwebo singaphuma ungakafiki umhla ka-15 kwephezulu noma siphume ngawo. Isitatimende sokulahlwa kwakhe ngamacala sithunyelwe kuwo wonke amakomiti eNFP, okuyiNational Working Committee, iNational Executive Committee (NEC), iNFP KZN Provincial Executive Commmitte ( KZN-PEC ), iProvincial Adhoc Committees, iLegitimate Constituency Structures, iConstituency Adhoc Committees, iNational Autonomous Adhoc Committees nakumalungu eNFP.
