UMNU Floyd Shivambu uthi ukwemukela ngenhliziyo emhlophe ukucinywa kobulungu bakhe emabhukwini eqembu uMkhonto weSizwe Party (MK Party), futhi akekho umholi walo amubambele igqubu.
Phambilini uShivambu ubengunobhala-jikelele nomdidiyeli weMK Party kuzwelonke ngaphambi kokumemezela ukuthi uyashiya kuleli qembu, alijoyine esuka kwi-EFF.
“Ngeke ngisiphikise lesi sinqumo ngoba ngiyazihlonipha izinhlelo nezinhlaka zeqembu engike ngalisebenzela. Ezinyangeni eziyishumi ezedlule ngiyingxenye yobuholi beMK, ngibe nenhlanhla yokusebenza namaqabane azinikele empini yokuthuthukisa abantu baseNingizimu Afrika ngokomnotho nangokobulungiswa,” esho.
Ubonge amalungu aleli qembu nabaholi balo, wabe eselifisela okuhle kodwa. Uthi ukunqanyula kobulungu bakhe kuzomnika ithuba elanele lokugxila enhlanganweni yakhe i-Afrika Mayibuye, nohlelo lwayo lokuzwa izimvo zabantu.
“Leli qembu (iMK Party) liqinise ukuzibophezela kwami ebuholini obuqotho nasempini yokungalingani, nenkohlakalo. Isipiliyoni engisitholile kasikushintshanga engikholelwa kukho, kodwa sikwenze ngcono, sangilungiselela isikhathi esizayo ekusebenzeleni izwe.”
