USHODE ngosaziwayo umcimbi waminyaka yonke wamahhashi nemafashini osubizwa ngeWorld Sport Betting Cape Town Met obuseKenilworth Racecourse eKapa ngoMgqibelo.
Lo mcimbi oke waba nedumela eminyakeni eyedlule ukhombise ukwehlelwa yizinga kulo nyaka njengoba bebeyidlanzana abebewuhambele uma kuqhathaniswa neminyaka eyedlule.
Nakuba ubungenalo isasasa kulo nyaka kodwa abasiki bengqephu bakwazile ukuveza ikhono labo ngemisiko yabo esezingeni njengoba bekukhangisa labo abanegama kulo mkhakha.
Phakathi kwabasiki bengqephu abebekhona kubalwa inkakha uGavin Rajah, Thula Sindi, Masango By Siphesihle, Imprint, Sipho Mbuto, Ramo Jozsy, Fikile Sokhulu, Cindy Bam nabanye.
Phakathi kwedlanzana losaziwayo ababonakale kulo mcimbi kubalwa uNomuzi Mabena, Khosi Twala, Sive Ngesi, Maps Maponyane, Pamela Mtanga, Moshe Ndiki, Gugu Khathi nabanye.
Lo mcimbi obugabe ngokuxuba izinhlanga ezahlukene zabantu uphothulwe ngomcimbi osezingeni lapho kunandise khona uZakes Bantwini, DJ Zinhle nabanye.
UThula Sindi uncome izihambeli zalo mcimbi ngokuhlonipha ingqikithi yawo yeCouture Unleashed.
Uthe njengomsiki wengqephu kuyamthokozisa ukubona abantu behlonipha le ngqikithi njengoba kusho khona ukuthi bayayiqonda ukuthi isho ukuthini kubona.
Uthe ngokwakhe ingqikithi yalo nyaka isho ukuthi ukuveza umzimba ngendlela ehloniphekile bese uyiphelezela ngomhelana osezingeni.
Lo mcimbi wenzeka minyaka yonke njengoba phambilini wabe ubizwa ngeJ&B Met ngemuva kwalokho wabizwa ngeSun Met njengoba kulo nyaka usubikwa nge-WSB Cape Town Met.
Phambilini ubuvamise ukugaba ngosaziwayo abahlukene futhi unesasasa eliphezulu njengoba ubalwa neminye yemijaho yamahhashi ohambisana nemfashini omukhulu kuleli kwazise omunye ofuze wona iHollywoodbets Durban July wona owenzeka eThekwini ngempelasonto yokuqala kuNtulikazi.
