INKAKHA emculweni uThandiswa Mazwai ithi izizwa ithobekile ngokuqokwa kahlanu kwe-albhamu yayo iSankofa, emcimbini weSouth African Music Awards (Sama) wanonyaka.
Le ntokazi ezakhele ugazi ngamanoni esingabala kuwona elithi, “Zabalaza”, elithi “Nizalwa Ngobani”, elithi “Lahl’ umlenze” namanye, izogubha iminyaka ewu-30 isemkhakheni wezomculo, iphinde yethule ifestivali yaminyaka yonke.
“Kakukholakali ukuthi ngizohlanganisa iminyaka ewu-50 ngidla anhlamvana futhi sengichithe ingxenye enkulu yempilo yami emculweni. Ingoma yami yokuqala yaba khona eminyakeni ewu-30 edlule, neqembu elibizwa ngeJacknife,” isho.
UThandiswa uthi iSankofa Heritage Festival izobe ibungaza ubuciko namasiko, futhi inike abeza ngemuva ithuba lokuvelela. Nguyena uqobo ozokube ecula phambili, kanti uzomema amanye amaciko ayecula nawo phambilini.
Le festivali izoba mhla ka-28 kuNhlolanja (February) eCarnival City, eGoli, kanti amathikithi atholakala eComputicket.
“Sikhulu isidingo sokuthi kube namafestivali anjengalawa, azogxila emacikweni, emculweni, enkululekweni nasemphakathi wonkana. Ngijabule ukuthi nami ngizokuba yingxenye yalokho. Inhloso yale nkundla kakusikho ukuvulela amaciko asemasha ithuba kuphela, kepha wukubungaza amasiko nobuntu,” echaza.
