UTITINYWE wumphakathi waze wafa owesilisa osolwa ngokushaya, abulale intombi yakhe esigamekweni esenzeke eMpangeni ngoLwesihlanu. Kubikwa ukuthi lona wesilisa onguMnu Xolani Ntuli, ushaywe wumphakathi maqede wahudula isidumbu sakhe wasishiya eceleni kwesentombi yakhe, uNkz Nosipho Biyela (25), asolwa ngokuyishaya, ayibulale.
Kunezinsolo zokuthi uNtuli uqale ngokumdlwengula umufi. Ngokuthola kweLANGA, laba bobabili bebesebudlelwaneni bezothando. Kuthiwa ingxabano phakathi kwabo iqubuke sebehamba ndawonye, okulapho kuthiwa uNtuli ube eseshaya umufi wamshiya ezitshela ukuthi usefile, kanti uzokwazi ukutshela abadlulayo ukuthi ushaywe yisoka lakhe.
Umthombo weLANGA okuleya ndawo, uthi laba bobabili bebengebona abokudabuka eMpangeni.
“UNtuli ungowokudabuka eMtubatuba, kanti lona wesifazane yena ungowaseNcekwane, kodwa bebehlala emjondolo bobabili. Akucaci ukuthi yini ebaxabanisile. Uma sizwa, bebehleli ndawonye endaweni yokucima ukoma, kukuhle, kungekho nkinga. Baqale ukuxabana sebehamba endleleni.
“Umufi ubeshaywe kanzima ngoba umzimba wakhe ubulimele kakhulu. Emuva kwesikhashana, ushonile. Umphakathi ube usuhlangana, wanikela emjondolo kaNtuli, bamfica elele engazi nanyaka, wabe usumthelekela ngenduku. Umshaye waze washona maqede isidumbu sakhe wayosilahla eduzane nesentombi yakhe,” kusho umthombo.
Uqhuba umthombo, uthi isidumbu sikaNtuli besiboshwe izandla nezinyawo ngesikhathi silahlwa eduzane kwesikaNksz Biyela. Okhulumela amaphoyisa KwaZulu-Natal, uLt-Col Paul Magwaza, usiqinisekisile lesi sigameko, wathi amaphoyisa aseMpangeni avule amacala amabili okubulala, kulandela isigameko esenzeke ngoLwesihlanu.
Uthi ngokombiko abawutholile, lezi zithandani bezihleli ndawonye etavern, kwaqubuka ingxabano. Uthi msolwa ufike esehamba yedwa endlini, okuthe uma ebuzwa ukuthi isinqandamathe sakhe siphi, wathi usishiye endleleni. Uthe umphakathi ube ususithola isidumbu sesinqandamathe sikaNtuli, wabe usumlanda, wamtitinya waze wafa.
