KULINDELEKE abuyele kwiKhomishini kaMadlanga namuhla (ngoLwesihlanu) umholi weNational Coloured Congress noyilungu lePhalamende, uMnu Fadiel Adams olokhu eyindaba egudwini ngendlela aphendula ngayo nokushiya imibuzo eminingi ngokuziphatha kwakhe.
U-Adams uyena owenza incwadi efungelwe eyasetshenziswa yi-Investigating Directorate Against Corruption (IDAC) ukubopha izikhulu zamaphoyisa zeCrime Intelligence okungoLt General Dumisani Khumalo nabanye.
KwiMadlanga u-Adams ungufakaza ozwakala enhlanhlatha nozama ukuphoqa ukuthi kuzwakale izinto ngendlela azichaza ngayo.
Okuphinde kumangaze ukuthi u-Adams uveze kwikhomishini ukuthi incwadi efungelwe ebizwa ngoSection 27 ayiyisa kwi-IDAC iphinde ibe nezinsolo ezithinta ukusebenza kwePolitical Killings Task Team (PKTT) yaKwaZulu-Natal, okuyinto ephambanayo neyashiwo ngu-Adv Andrea Johnson owayekwi-IDAC owathi yayingenalutho oluthinta lolu phiko.
U-Adv Johnson wayelokhu emile ekutheni i-IDAC yayingaphenyi iPKTT, ekubeni u-Adams okuyinto ayiphikayo u-Adams.
Uthi incwadi yakhe efungelwe yayikhalaza ngakho ukukhushulelwa ezikhundleni kwezikhulu zamaphoyisa yiCrime Intelligence.
Lokhu kushiye abeKhomishini benokudideka ukuthi kungenzeka yini ukuthi kuqanjwa amanga ngale ncwadi efungelwe ka-Adams noma isishintshiwe.
Lokhu kudide ngisho nosihlalo wekhomishini uJustice Mbuyiseli Madlanga, Sesi Baloyi, noSandile Khumalo.
U-Adams uze waveza nokuthi kunecala lobugebengu alivulela uMnu Dylan Perumal oyinhloko yabaphenyi kwi-IDAC kodwa lelo cala laphelela emoyeni.
U-Adams uphinde aveze ukuthi wadukisa ungqongqoshe wamaphoyisa uMnu Senzo Mchunu ukuthi kukhona amaphoyisa azama ukufihla idokodo ngecala alivulela iCrime Intelligence.
U-Adams wavula amacala eCape Town ngo-October 29, 2025 namanye eGauteng ngo-October 31.
Ngosuku olulandelayo eqeda ukuwavula wathumelela ungqongqoshe uMchunu ukuthi kukhona abazama ukufihla amadokodo amacala awavulile.
UKhomishana uLee Segeels-Ncube ubelokhu embuza ukuthi kungani enza lokhu engakabheki eziteshini zamaphoyisa avule kuzona amacala kulezi zifundazwe ukuthi akuphenywa yini.
U-Adams uvele wavika ngoMajor General Andre Lincolin ongasekho emhlabeni nowayekwezokuvikela ethimbeni likaDkt Nelson Mandela ukuthi uyena owamyalela ukuthi akalandelele indaba yamacala awavulile.
Lokhu kucasule uKhomishana Segeels-Ncube ukuthi akakwazi u-Adams ukuthi angavika ngomuntu ongasekho emhlabeni.
U-Adams uphinde akhohlwe nangendlela okumele abize ngayo uSihlalo wekhomishini njengoba kwesinye isikhathi embiza ngo-Chief, okuyinto uMadlanga abuye amxwayise kuyona.
Noma ethula ubufakazai uzwakala etatazela efuna nokungena abantu emlonyeni besakhuluma ehlohla namazwi.
Nasezinkundleni zokuxhumana abantu balokhu beshilo ukuthi u-Adams ucabanga ukuthi kuyadlalwa kwiMadlanga.
