IZICISHAMLILO zikwazile ukulwa zizezinqobe ikloba lomlilo, eliqubuke enkampanini iRichards Bay Minerals (RBM), ngoMsombuluko. Isitatimende esikhishwe yinkampani, ngoLwesibili sithi umlilo udalwe yinkinga kumakhebuli kagesi akekho umuntu othungeleke emlilweni, njengoba bekunalezo zinsolo.
“Abekho abasebenzi benkampani abalimele kulomlilo. Nalabo abasebenza ezinkontilekeni, ezingaphakathi enkampanini, abathintekanga. Yize uphenyo lusaqhubeka ngenhloso yokuthi imililo enje, ingaphinde iqubuke enkampanini. Singakuqinisekisa ukuthi ukusebenza kuqhubekile, namhlanje ekuseni,” kusho isitatimende.
Umlilo uqubuke ehhovisi lalapho, kumbiwa khona umkhiqizo. Inkampani iRBM, iyaphika ukuthi umlilo uthungelwe ngabantu abanezikhalo ngendlela izinto eziqhutshwa ngayo, ikakhulukazi ukuphathwa kwabasebenzi, njengoba bekubikiwe. Inkampani ayidalulanga ukuthi ubalelwa emalini engakanani, umonakalo odaleke ngokuqubuka kwalomlilo.
menzi.jele@ilanganews.co.za
