UNGUMUNTU ohlala ekulangazelela ukuzisa abanye abantu uNolinda Mqadi (14), waseMlazi, ozomela iKwaZulu-Natal emcintiswaneni kaMiss Teen Universe SA, ePolokwane, eLimpopo, kule mpelasonto.
UNolinda, owenza uGrade 9 eDurban Girls High School, eThekwini, uthi kubalulekile, ikakhulu ebantwaneni, ukusheba imfundo nezinye izinto eziphumuza umqondo.
Uthi akuthandile ngomcintiswano kaMiss Teen Universe wukuthi ukhuthaza ukubuyisela emphakathini nokwakhwa imiphakathi engcono.
“Ubuhle kabukho kuphela ekubukekeni komuntu, kodwa buphinde buvele enhliziyweni ngamazwi nezenzo zakhe, ezenza umehluko emphakathini,” esho.
Unohlelo kuYouTube (vlog) nakuTik-Tok lapho ekhuthaza khona intsha ngezinto ezithinta impilo.
“Nginohlelo olubizwa ngePower Hour, lapho ngixoxa khona ngezihloko ezehlukene ezifana nemfundo, ukuzethemba nokusebenzisa amathuba okuzithuthukisa. Ngiphinde nginikele ngemifaniswano yesikole nezinye izidingo ezithinta isikole.”
Unina kaNolinda, uNkz Nombuso Cele, uthi kusukela ebuncaneni, ingane yakhe ihlale inentshisekelo yokuzama izinto ezehlukene empilweni.
Uthi yabona isikhangiso salo mncintiswano ngo-2023, yacela kuyena noyise wayo ukuwungenela. Uthi uyise ushone ngawo lo nyaka ngemuva kokuba uNolinda esebhalisile ukungenela.
“Ngicabanga ukuthi nakho ukudlula kukayise ngenye yezinto ezimnika umdlandla. Ngiyethemba ukuthi uzokwenza kahle kulo mncintiswano,” kusho uNkz Cele.
Uthi umndeni uyaziqhenya ngoNolinda ngoba uyingane ekhaliphile futhi ehloniphayo.
“Uyingane ebamba noma yini eyithuba eqhamukayo. Uzifundisile ukuthi kayikho into engamehlula empilweni.”
Ozonqoba kulo mqhudelwano uzothola ithuba lokuyodlana imilala nezintokazi ezivela umhlaba wonke kuMiss Teen Universe.
