UZOHLONIPHA uyise ngemjiva yesintu emcimbini weMetro FM Music Awards uSiyabonga Ngwekazi owaziwa ngelikaScoop Makhathini omenyezelwe njengomunye wabethuli balo mcimbi omkhulu wokuhlonipha abaculi ozoba ngomhla ka-3 kuNhlaba 2025 ezinkundleni zemidlalo eMbombela eMpumalanga.
UScoop Makhathini uzokwethula lo mcimbi ngokubambisana nomsakazi weMetro FM uLuthando Lootlove Shosha oshayela uhlelo lwantambamba phakathi nezinsuku kulo msakazo.
UScoop Makhathini uxoxe neLANGA ngaleli thuba alitholile lokuba ngumethuli walo mcimbi.
Uveze ukuthi uzizwa ethobekile ngokunikezwwa ithuba kumabonakude nakuba sekunesikhathi engabonakali ezinhlelweni zawo.
“Leli thuba lisho kukhulu kimina ikakhulukazi ngoba ubusuku balo mcimbi buchaza ubukhosi lapho abaculi besuke behlonishwa khona ngemisebenzi yabo yokusadansizwa nangodlala ngemizwa yethu ngokucikoza kwabo,” kusho yena.
Ubusuku bobukhosi lobu “ingakho nami ngizimisele ukwenza into yamehlo ezothokozisa wonke umuntu ozobe ekhona nalowo ozobe ebukele ekhaya,” kusho lo methuli.
Uthe ngalobu busuku uzimisele ukushintsha izikhawu edlubha imswenko eyahlukne yabasiki bengqephu okubalwa kubo uWanda Lepoto noSamkelo Boyde.
“Njengoba ngaziwa ukuthi ngiwumuntu wesatyela ngizobabonisa ukuthi ngisenaso kodwa ngizosenza ngendlela ehambisana nobukhosi njengoba kuwubusuku babo,” kusho yena eveza ukuthi uzongena kulo mcimbi edlubhe imijiva yesintu kayise ngenhloso yokumhlonipha njengoba naye edabuka ebukhosini.
Kulo mcimbi kulindeleke ukuthi kuhlonishwe abaculi bakuleli ngezingoma zabo abazikhiqize ngonyaka owedlule nakulo nyaka.
