NONHLAKANIPHO SHINGA
INTATHELI yezindaba, uDawud Phungula, eke yasebenza kwiSoweto TV, iseveze ukuthi isizokwethula izindaba kuSABC 1.
Le nsizwa yaseNtshangwe, ithi ukuvulelekwa yileli thuba elingandele bani kusho ukukhula kuyona emkhakheni wezobuntatheli.Â
“Kuyangijabulisa ukunazisa ukuthi sengizokwethula izindaba esiteshini iSABC 1, okuyinto esho lukhulu kumina. Lokhu kuyisifundo sokuthi uma unephupho ungalibukeli phansi, kepha ukholelwe ekutheni liyogcina lifezekile,” kusho yena.
Uthi uyakholelwa ekutheni lokhu kuseyisiqalo njengoba ezimisele ngokusebenza kanzima.
“Ngibonga kakhulu kwiSoweto TV, imisakazo esengike ngasebenza kuyona nabo bonke okuneqhaza abalidlalile empilweni yami. Ngibonga nothisha wami, uMnu Robin Sewlal,” kusho uPhungula esitatimendeni.
Kuzokhumbukela ukuthi ezinyangeni ezine ezedlule, le nsizwa ishiye isiteshi somsakazo iGagasi99.5 FM, njengoba beyethula izindaba kusona. UPhungula uzakhele ugazi nasezinkundleni zokuxhumana, ikakhulukazi kuYoutube njengoba enabalandeli abangaphezulu kuka-160 000 kwiChannel yakhe, iDawud TV ZA.
Nangemuva kokushiya iGagasi, wayesho ukuthi iphupho lakhe elikhulu wukusebenza kumabonakude.
