UZOQHUBEKA nokuhola umholo wakhe uNobhala we-ANC KwaZulu Natal uMnu Bheki Mtolo nakuba sekuphelile ngesikhundla sakhe kulandela ukumenyezelwa ngokusemthethweni kobuholi obusha obuchitshiyelwe baleli qembu.
NgoLwesibili uNobhala Jikelele waleli qembu kuzwelonke uMnu Fikile Mbalula umemezele ubuholi obusha obuhlanganisiwe baleli qembu obuzoholwa uMnu Jeff Radebe njengoConvenor, uNkk Weziwe Thusi njengePhini lakhe lokuqala, uMnu Siboniso Duma njengePhini lesibili, uMnu Mike Mabuyakhulu onguCoordinator, uNkk Nomusa Dube Ncube oyiPhini lakhe noNkk Nomagugu Simelane onikwe esikaFundraiser.
Kulobu buholi babili kuphela ababuyisiwe kulobo obudala obuhlakaziwe njengoba kubuye uDuma noNkk Simelane.
Echaza ngokuhlanganisa lobu buholi obusha uMbalula uthe bakhethe ukuhlanganisa ubuholi obumnkantshubomvu nalobu obusha ngenhloso yokuvuselela leli qembu elibukeka liqhubeka nokwehlelwa ngabavoti.
Sekuyindaba esegudwini ukuthi lalahlekelwa ngamandla okuphatha uhulumeni wakulesi sifundazwe okhethweni lwangonyaka owedlule njengoba seliyiqembu lesithathu ngemuva kwe-MK Party ne-IFP okuyiyona ehola isifundazwe ngokuhlanganyela nayo i-ANC,DA ne-NFP.
UMbalula uthe njengobuholi bukuzwelonke bathembe lobu buholi ukuba buqhamuke namasu okuguqula isimo saleli qembu livuseleleke kabusha.
Uthe lobu buholi kumele bungapholisi Maseko njengoba isimo seqembu sisibi futhi kumele busiguqule ngokushesha njengoba ebunika izinyaka eziyisithupha.
UMbalula utshele abezindaba eMoses Mabhida Stadium ukuthi uMtolo uzoqhubeka nokuhola kuleli qembu kuze kube kuphela isikhathi sakhe abesibekelwe sokubha nguNobhala waleli qembu.
UMtolo ungunombolo 15 ohlwini lwabaholi abawu-67 abahlanganisiwe ukumela isigungu esiphezulu esifundazweni.
Ujutshwe esikhundleni sokuba yi-Convenor: Policy, Monitoring and Evaluation.
UMnu Sipho Hlomuka obeyiPhini likaNobhala noDkt Ntuthuko Mahlaba obenguMgcinimafa basekhona esigungwini esihlanganisiwe kodwa bakleliswe kude ngokwezinombolo.
Leli qembu liphinde lamemezela nomkhulumelo walo omusha esifundazweni uMnu Fanle Sibisi njengoba ehoxisiwe kulesi sikhundla uMnu Mafika Mndebele.
