INTATHELI YELANGA
KUVELA ezithi uzoyikha ngamahalavu kwiJeddah SC yaseSaudi Arabia – edlala esigabeni sesibili – umgadli waseBurundi, uBonfils-Caleb Bimenyimana (27), owaxoshwa yiKaizer Chiefs esagijime isizini eyodwa yamabili ayewasanilile nale kilabhu.
Lo mgadli wafika eNingizimu Afrika wathembisa emuva kokuba evule i-akhawunti yakhe yamagoli, eshaya amabili iziMpofana ziguqisa iSuperSport United (engasekho) ngoNcwaba (August) ka-2022. Elinye lalawo magoli kwakuyiphenathi. Wabuya ngesikhathi iChiefs ibhabhadisa iStellenbosch FC ngo-3-1 ngoMfumfu (October), washaya amaphenathi amathathu, okwenza abathandi beziMpofana babona umgadli ozobatakula. Nokho isomiso samagoli emidlalweni elandelayo, saholela ekutheni achithwe esagijime imidlalo ewu-17, enamagoli awu-7.
Ngokubika kwe-Africafoot, uBimenyimana ongenasinqe emakilabhini – njengoba kwawu-10 asegijime kuwona, ingabalwa iJeddah SC, emabili kuphela asahlale kuwona amasizini amabili – uzogoduka no-R6 million ngonyaka.
Lo mdlali uthe efika nje, wenza adume ngazo ngoLwesihlanu ngesikhathi iJeddah idla i-Al-Jubail ngo-3-1. Ucime igoli le-Al-Jubail, eqobela phakathi iphenathi.Â
