KUPHENDUKE amatafula, wenyuselwa isigwebo owesilisa obedlulise isinqumo senkantolo ngesigwebo asithola ngecala lokudlwengula owesifazane othandana nobulili obufana nobakhe (owesifazane).
INkantolo eNkulu yaseMgungundlovu, inyuse isigwebo seminyaka ewu-25, saba wudilikajele kuSakhile Phumokwakhe Mhlanga ngecala alenza ngo-2016. Kuthiwa uSakhile walahlwa yileli cala, wagwetshwa yiNkantolo yesiFunda yaseNgwavuma iminyaka ewu-25 ebhadla ejele ngoNdasa (March) wango-2018.
Ngemuva kokugwetshwa, wafaka isicelo sokudlulisa icala. Ngokwesitatimende seNational Prosecuting Authority (NPA), isisulu sasineminyaka ewu-18 ngesikhathi kwenzeka lesi sigameko.
Kubikwa ukuthi uSakhile wadlwengula lona wesifazane eMahinga, eNgwavuma. Ngosuku lwesigameko, kuthiwa isisulu sasisesitolo, ngesikhathi sihlangana noSakhile, waseshela. Kuthiwa samtshela ukuthi kasithandani nabesilisa, kodwa sithandana nabesifazane.
Kuthiwa sahamba sabuyela endlini yaso, uSakhile wadlulisa isikhathi esincane wasilandela, wafika endlini yaso wabulala iwindi, wangena ngalo, wasishaya, wasigwaza, qede wasidlwengula.
Kuvela ukuthi waqeda lapho wasiqhuba, wahamba naso waya kubo, waqhubeka wasinukubezela khona. Isisulu sagcina sikwazile ukuphunyuka, sayovula icala emaphoyiseni.
USakhile waboshwa ngemuva kwezinsuku eziwu-7 isigameko senzekile. Icala laqulwa, kwabizwa bonke ofakazi, wagwetshwa ngomhla ka-22 kuNdasa (March) ngo-2018.
NgoMfumfu (October) ka-2021, uMhlanga wabe esefaka isicelo sokwedlulisa isinqumo senkantolo ngesigwebo anikwa sona, waze wavunyelwa ngo-2022 ukuba akwenze lokho. Umshushisi uKrishan Shah, obemele umbuso, ubephikisana nokuthi kubuyekezwe isigwebo njengoba ethi kwasekuqaleni uMhlanga kwakumele athole udilikajele.
