YETHANYELWE yidlanzana inkonzo yokuphelezela uSolwazi Sibusiso Mandlenkosi Emanuel Bengu (90) ebise-University of Zululand (Ongoye), KwaDlangezwa, eMpangeni.
UBengu waba ngungqongqoshe wokuqala woMnyango wezeMfundo kuleli, ngaphansi kukahulumeni wentando yeningi owawuholwa nguDkt Nelson Mandela naye ongasekho.
Umufi udlule emhlabeni mhla ka-30 kuZibandlela (December) nyakenye. Iningi lamalungu omphakathi belingeyona ingxenye yale nkonzo.
UBengu, owazalelwa emishini yaKwaSizabantu, eKranskop, uhlonishwe nguMengameli Cyril Ramaphosa ngomngcwabo kahulumeni, osesigabeni sesibili.
Inkonzo yanamuhla ibihanjelwe yizicukuthwane zemikhakha eyehlekene. Phakathi kwabaholi abashiyelane inkundla kubalwa uDkt Nkosazana Dlamini-Zuma, naye oke wahola lomnyango.
Uhlelo beluphethwe nguDkt Blade Ndimande noMnu Bheki Khumalo, kanti isekela likamengameli uMnu Paul Mashatile libe yisikhulumi sosuku.
