IZIMVULA ezinamandla, ebeziphelekezelwa ukuduma kwezulu, zedlule nemiphefumulo engu-11, KwaZulu-Natal kusukela ngenyenga edlule (uZibandlela). Ngempelasonto esiphuma kuyo, kubhubhe abantu abathathu ezehlakalweni ezahlukene eKZN.
Endaweni yaseMpofu, eShowe, umfana oneminyaka eyi-6, uBanele Mpungose, washaywa ngumbani ephakathi endlini.
EDarnal, ngaphandle kwaKwaDukuza, uLwadile Pasi, wemuka nomfula, kwathi uSiyabonga Mavundla, wasoHwebede, eMacambini, naye wemuka nomffula.
UMntwana omdala waseNdlunklu kaZulu, uMntwana uPhilemon kaTshelendoda kaDinuzulu wasesigodlweni KwaFihlinqindi, oSuthu, KwaNongoma, ushelwe ngumuzi ngesikhathi kugasela umbani.
Okhulumela uMnyango wezokuBusa ngokuBambisana neziNdaba zoMdabu (COGTA)eKZN, uMnu. uSenzelwe Mzila, uthi uNgqongqoshe walo Mnyango, uMfundisi uThulasizwe Buthelezi, usejube ithimba elizosiza izisulu sezinhlekelele.
“Kucekeleke phansi ingqalasizinda enkulu KwaZulu-Natal, nethimba elijutshwe wu-Eskom nalo likhona ukuzosiza abehlelwe imishophi,” esho.
Khonamanjalo, kuzothi kusasa ngoLwesihlanu, uNgqongqoshe uMfundisi uButhelezi, avakashele uMasipala iRay Nkonyeni, ePort Shepstone ,okhungethwe izinkinga. Izisebenzi kuloya masipala sekunenyanga zangena esitelekeni.
Udoti owuthuthwa, kanti nezinye izinsiza ezilethwa emiphakathini azikho.
UMfundisi uButhelezi, uzohlangana nezimeya, izikhulu zikamasipala, izinyunyana zabasebenzi, namakhosi aphethe izindawo ezingaphansi kweRay Nkonyeni.
