ZIBIKELWE uMholi webandla lamaNazaretha elidume ngokuthi ngelakwaShembe ohlangothini lwaseBuhleni oluholwa yiNkosi uMduduzi ‘Nyazilwezulu’ Shembe izinkinga ezikhungethe i-EFF eholwa nguMnu Julius Malema ongumengameli wayo.
UMalema oteketiswa ngelokuthi ungukhomanda omkhulu waleli qembu ube eyingxenye yezethameli enkonzweni yeSabatha ebelibanjelwe eLindantonga, KwaNongoma namhlanje.
Umthombo osondelene noNyazi utshele leli phephandaba ukuthi uMalema ubeyobika izinkinga ezibhekene nempilo yakhe, waphinde wabika inkinga ekhungethe iqembu lakhe elihlubukwa ngamalungu amanye awo angabaholi futhi abayingxenye yokusungulwa kwalo
“Angithi uyazi ukuthi iqembu lakhe lishiywa ngabantu abayizethenjwa. Bonke babikwe oNyazini. UNyazi lubusisa bonke abantu abafika kulona. Naye uMalema unikiwe isibusiso, iqembu lakhe lizobuyelwa ngamandla njengasekuqaleni,” kusho umthombo.
UMalema ushaye ngamafushane wathi bafike kuleli bandla ngoba bayizingane zalo futhi inhloso yabo enkulu wukuzobika umcimbi waleli qembu ozobanjelwa enkundleni yezemidlalo iKing Zwelithini, eMlazi, eThekwini lapho khona leli qembu lizobe linomcimbi wokubungaza usuku lwabantu abasha ngoMsombuluko
“Siyizingane zaleli bandla. Sinamalungu aleli bandla. Okukhulu sizobika umcimbi esizowenza eThekwini. Sikubika lokhu ngoba senzela ukuthi ningamangali uma nibona imibala ebomvu isabalale esifundazweni iKwaZulu-Natal. Siyabuhlonipha ubuholi baleli qembu siyabahlonipha futhi nabo bonke abakhonza kulona,” kuphetha uMalema.
