UMNYANGO wezokuBusa ngokuBambisana nezoMdabu KwaZulu-Natal uthi usezinhlelweni zokubuyisela izinto esimweni esijwayelekile ezindaweni ezikhahlanyezwe yizimvula ezinamandla ezihlasele ezindaweni ezehlukene esifundazweni izolo ebusuku.
Lo mnyango ukhiphe isitatimende namuhla ngoMsombuluko, uthi: “Seziqaliwe izinhlelo zokukhuculula kulandela imvula enamandla ehlasele ezindaweni ezisogwini, okubalwa kuzona eThekwini naseMgungundlovu.”
Umnyango uthi umonakalo omkhulu obikiwe kubalwa izihlahla eziwele emigwaqweni, ukulimala kwezintambo zikagesi, namanzi amaningi ashiye udaka, inhlabathi namatshe emigwaqweni. Uthi le mvula ibihambisana nomoya onamandla, ukuduma kwezulu nezichotho.
“Umnyanyo wakwaCogta esifundazweni, neProvincial Disaster Management Centre basebenzisana nomasipala nezindawo ezithintekule ukukhuculula imigwaqo nokuqinisekisa ukuthi kubuyelwa esimweni ukuhanjiswa kwezidingo kubantu,” kusho isitatimende.
Umnyango uthi uzokhipha umbiko ngomonakalo usuwonke, uwa seluphothuliwe uhlelo lokuhlonza. UMasipala weTheku nawo ukhiphe isitatimende, uthi ithimba lawa elibhekelele izinhlekelele lumatasa nokuhlonza umonakalo odalwe yizimvula ngaphansi kwawo.
“Umasipala unxusa izakhamizi ukucophelela, ugweme imigwaqo enamanzi, futhi ubike izinto ezinobungozi njengezihlahla eziwele emigwaqeni, izintambo zikagezi eziwe phansi. Uthe umphakathi kumele ubike konke ukuphazamiseka ngezindlela ezigunyaziwe zokuxhumana nomasipala,” kusho umasipala esitatimendeni.
Wexwayise abashayeli ukugwema ukuwela amadamu amanzi emigwaqwemi ngoba ungathola ukuthi kulawa mathantala, kunemigodi ejulile, enobungozi ngaphansi.
IZITHOMBE: wuMASIPALA WETHEKU
