ZIMKHALELE umlisa waseSikhaleni oyanyaniswa necala lokubulala iphoyisa uCapt Mandla Khubisa, obesebenzela esiteshini samaphoyisa eMpangeni.
Kubikwa ukuthi ngomhla ka-14 kuZibandlela (December) nyakenye, abasolwa abathathu bangena emzini ongumakhelwane kamufi eH2 eSikhaleni, bakhomba ngezibhamu abantu, bafuna ngodli imali namaselula. Ezinye zezisulu zakwazi ukubaleka, zaya emzini kaKhubisa, ziyobika ngesigameko sokubanjwa inkunzi.
UCapt Khubisa wayengekho kwakhe ngaleso sikhathi, inkosikazi yakhe yamfonela imbikela ngaso. Kuthiwa ekufikeni kwakhe uKhubisa, izigebengu zavulela ngenhlamvu zibhekise kuyena, washonela endaweni yesigameko, izigebengu zathatha isibhamu sakhe somsebenzi.
Kuthiwa inkosikazi kaKhubisa nayo yadubuleka kulesi igameko, yaphuthunyiswa esibhedlela. Omunye wabasolwa watholwa esefile emzini obude buduze nendawo yesigameko, kwatholakala kuyena isibhamu esingekho emthethweni namaselula ayethathwe kubanjwa inkunzi.
Kwavulwa icala lokubulala, elokuzama ukubulala nelokubamba inkunzi esiteshini samaphoyisa eSikhaleni, idokodo lanikwa uphiko loKlebe, oluphenya ubugebengu obuhleliwe nobubucayi.
Ngemuva kophenyo olunzulu loKlebe, kwaboshwa uMkhwanazi ngosuku olulandela olwesigameko, watholwa nezibhamu ezimbili, esinye sazo okungesikaCapt Khubisa. Wavela eNkantolo yeMantshi yaseMthunzini, wathi akayifuni ibheyili.
Ekuqhubekeni kophenyo loKlebe ngesigameko sokubulawa kukaCpt Khubisa, bakwazile ukuyamanisa uMkhwanazi naso, wabekwa amanye amacala ngokusemthethweni. Kulindeleke ukuthi avele phambi kwemantshi eSikhaleni namuhla.
Oyinhloko yoKlebe KwaZulu-Natal uMajor-General Lesetja Senona uncome umsebenzi wamaphoyisa oholele ekuboshweni komsolwa.
