KUTHIWA sezikuvuthondaba izingxoxo zokudayiswa kweSuperSport United, ngenhloso yokuba kuvuswe ikilabhu ethandwa ngabaningi eBloemfontein.
Ngokombiko weSoccerBeatZA, maningi amathuba okuthi iSiwelele Samasele sibonakale kwiBetway Premiership ngesizini ezayo. Kwehlukene imibono ngalezi zindaba njengoba womabili lawa makilabhu enomlando onothile ebholeni laseNingizimu Afrika.
ICeltic igcine ukuba khona ngo-2021 ithengwa yiRoyal AM kaShauwn Mkhize, nayo engeke isabonakala esigabeni esikhulu ngesizini ezayo kulandela ukuxoshwa yiPSL.
AmaTsatsantsa A Pitori anomlando ebholeni lakuleli, okubalwa kuwona nokunqoba iPremiership amahlandla amathathu kulandelana. Nokho athwele kanzima kule sizini njengoba ebalwa namakilabhu asengcupheni yokudliwa yizembe.
